Aizawl East District inkhawmpui a ṭiak

UPC North East India hnuaia Aizawl East District chuan March 7, 2024 zan aṭanga nizan thleng khan North Lungpherah inkhawmpui vawi 30-na an hmang.

Inkhawmpuiah hian March 8, Zirtawpni khan PYD leh Sunday School department-te'n a hran ve vein ro an rêl a, zanah châwl loa kum 25 chhung sunday school zirtirtu ni tawhte hnenah chawimawina an hlan. March 9, Inrinni khan kohhranpui rorel inkhawm neih niin, kum 2024-26 chhunga AED hruaitu turte thlan a ni a, superintendent atan Rev. R Laltlankima, secretary atan Rev. H Lalropuia leh treasurer atan Rev. VL Hnemtluanga te thlan a ni.

Nimin chawhma inkhawmah kum 25 chhung châwl loa kohhran upa leh rawngbawlna licence kawlte hnenah chawimawina hlan a ni a, pastor pali nemngheh a ni. Chawhnuah kohhran mi thite sûn a ni bawk.

UPC Aizawl East District-ah hian pastor bial 31-ah member 28,086 an awm a, kumin inkhawmpui leh inkhawmpui hmasa inkarah member thi mi 229 an awm. Kum 2023-24 chhungin thawhlawm hrang hrang aṭangin Rs 13,89,62,538 an hmu a ni.