Inthlan hun chungchangah rawtna Thlentu tur niin kan inhre lo - MPF

MPF president Rev. R Lalchang­liana chuan, VC leh LC inthlan turah mipui hnena ngenna leh thuchah MPF-in siam ṭhaa an hriat thu a sawi a, "Inthlanna thianghlim, zalen leh muanawm a awm ngei theihna turin mi tinin theihtawp chhuah ṭheuh ni se. Inthlanah hian khua leh tui dik tak, vote neite chuan thlak ṭheuh tur a ni," a ti.

Rev. R Lalchangliana chuan, MPF-te'n candidate-te leh party-te hnenah pawisa dil emaw, dawn emaw khap tlat a nih thu sawiin, "Candidate-te tan house to house phal a ni a, mahse, mi pahnih ai tamin an inṭawiawm tur a ni lo. Amaherawhchu, sum leh therhlo nena lên loh ni se," a ti a; party worker-te chu candidate tel loa house to house campaign phalsak an nih loh thu a sawi.

Social media hmanga dik lo taka thu thehdarh chu sorkar phal loh a nih thu sawiin MPF President chuan, "Dik lo taka thu thehdarh an awm chuan rang taka bawhzui nghal a ni ang. A ṭul anga puanzar a nih bakah, Election Commission of India-ah emaw, CID Cyber Crime-ah emaw hriattir nghal zel a ni ang," a ti.

Press conference kaihruaitu K Lalrinmawia, MPF vice president chuan, MPF-in VC leh LC inthlan an buaipui chhan chu inthlan an thlàwp vang a ni loh thu sawiin, "Keini'n kan duh ber chu inthlanna thianghlim leh felfai buatsaih a ni," a ti a; inthlanna thianghlim leh felfai a awm theih nan MPF chu che chhuak mai tur an nih thu a sawi.

Vanglaini palai zawhna chhangin MPF hruaitute chuan, VC leh LC inthlan hunah ngaihdan sawi tur nia an inhriat loh thu an sawi a, "Inthlan hun tur atana rawtna thlen tur kan ni lo. Inthlan avanga hri a darh zel lohna atan leh inthlanna thianghlim leh felfai a awm theihna atana ram leh mipui puih hi kan mawhphurhnaah kan ngai," an ti.

MPF hruaitute chuan, sum leh therhlo dang hmanga vote lei leh hralh chu Election danin a phal loh avangin tih hauh loh tur a nih thu sawiin, "Mipui, páwl hrang hrang leh kohhrante pawhin party leh candidate-te hnenah thil phût neih loh tur a ni," an ti a, mipui vantlang tana ruaiṭheh leh picnic chu a hautak avangin tih loh ni se an duh thu an sawi.

    Inthlanah hian khua leh tui dik tak, vote neite chuan vote thlâk ṭheuh tur a ni.

    MPF-te'n candidate leh party-te hnenah pawisa dil emaw, dawn emaw khap tlat a ni.

    Election puan a nih hnuah house to house campaign hi candidate-te tan phal a ni ang. Amaherawhchu, sum leh therhlo nena lên ni lo se. Party worker-te'n candidate-te tel loa house-to-house campaign neih loh ni se.

    Sum leh therhlo dang hmanga vote lei leh hralh hi election danin a phal loh avangin tih hauh loh tur a ni. Mipui, páwl hrang hrang leh kohhrante pawhin party leh candidate-te hnenah phût neih tur a ni lo. Thil chi hrang hrang sem (entirna'n - silpauline, jersey, football, mobile handset, etc.) leh sorkar develop­ment kal lai leh thil dang sem te, buh leh thil dang inphurhsakte hi Election Model Code of Conduct-in a phal loh avangin tih loh tur a ni.

    Mipui vantlang tana ruai ṭheh leh picnic hi a hautak êm avangin tih loh ni se.

    Candidate-te rulh tura dawr leh hmun danga thil lo lak leh pûkte pawh hi tih hauh loh tur a ni.

    Sorkar dan ding lai angin, vote la nei thei lote chu inthlan kaihhnawih thilah hman phal a ni lo.

    Party-te'n ṭul an tih chuan information centre neih theih a ni ang. Aurinna (loud speaker) hman phal a ni lo.

    Inthlan puan hnuah kawngzawh loh tur a ni.

    Social media hmanga dik lo taka thu thehdarh hi sorkar danin a phal loh avang leh a thehdarhtute chu na taka hrem theih a nih avangin tih hauh loh tur a ni. Dik lo taka thu thehdarh an awm chuan rang taka bawhzui nghal a ni ang a, a ṭul anga puanzar a nih bakah, ECI-ah emaw, CID Cyber Crime-ah emaw hriattir nghal zel a ni ang.

    Zu leh ruihhlo (drug) hmanga vote zawn hi ECI phal loh a nih avangin tih hauh loh tur a ni. Election information centre-ah leh polling area bul hnaiah zu leh ruih theih thilin a tihbuai mekte awm phal a ni lo.

    Invau leh inrîkrâp awm lo turin theih­tawp chhuah ṭheuh tur a ni a, security duty-te chauh lo chuan silai leh puak thei thil ken loh tur a ni.

    Helte hmanruaa hman leh ralthuam chelekna awm theite huai taka dodàl 

ṭheuh tur a ni.

    Border leh sensitive area-ahte a ṭul leh mamawh anga vênhimna a awm theih nan hmalak tur a ni.

    Vote thlak hi secret ballot a ni a, dan ding lai angin tu ma'n polling booth chhungah mobile phone ken luh loh tur.

    A tak ram thleng thei tur leh tihhlawh­tlin theih tur chauh manifesto, policy leh programme duan ni se.

    Mimal chungchang leh tualchhung thil chauh ni loin, party policy leh prog­ramme hi campaign-na leh inzawrhna atan hman ni se. Dâwt leh thu belhchian dâwl lo leh finfiah nghal mai theih loh hmanga inbeih loh ni se.

    Party malin emaw, independent candidate-in emaw public meeting neih an duh chuan MPF kaihhruaina hnuaiah neih a ni ang a, state páwn aṭanga campaign tura lo kalte pawhin public meeting an koh pawhin MPF-in a kaihruai zel ang.

    Vantlang tan thingpui lum loh ni se; polling booth area bul hnaia electoral roll en leh number pek chhuah hi political party-te'n a mala buaipui loin, MPF kaihhruainain fimkhur taka buaipui ni se.

    MPF leh political party-te'n ‘Thawhhona Thuthlung’ kan siam hi a zau thei ang bera thehdarh tur leh zâwm ṭheuh turin kan inngen a ni.

    Model Code of Conduct leh State Election Commission thu ngai pawimawh a, district election officer (DC) tinte ngenna tipuitling ṭheuh turin mi zawng zawng kan sâwm.

    Inthlanna thianghlim, felfai, dik tak 

leh muanawm kan neih theih nan Pathian hnena ṭawngṭai tur leh vote nei zawng zawngte vote thlak ṭheuh turin ka ngen.