HSLC zawhna siamtu suspend a ni: Minister-in HSLC zawhna a sawifiah

School Education minister Dr Vanlal­thlana chuan nimin Assembly session-ah High School Leaving Certificate (HSLC) Examination 2024 neih meka Social Science (SS) subject zawhnaa thil dik lo awm nia sawi a sawifiah a; zawhna siamtu chawlh lailawktir (suspend) a nih thu a sawi.

Dr Vanlalthlana chuan, HSLC exam mekah SS subject-a zawhna leh a hmaa Mizo High School zirtirtu pakhatin zirlaite hnena suggestion a pekte a inang ṭhup tih social media-a a darh veleh MBSE hotute'n hma an la nghal tih sawiin, "He thil hi Govt. Mizo H/S zirlai pakhat hnen aṭangin a chhuak tih hriat a nih hnuah MBSE chuan MISSTA President, Mizo H/S Headmaster leh zirtirtu inhnamhnawih nia rin chu ko nghalin, thu zawhfiah an ni," a ti.

Zirlaite pawh thu zawhfiah an nih thu sawiin Minister chuan, "Govt. Mizo H/S zirtirtu hian suggestion a lo pe ngei tih finfiah a ni. He zirtirtu hian naupang, zirnaa chak lo bik deuh ṭhenkhat, a hrana zirtirna (special class) neihpuiin, suggestion darh chhuak ta chu a pe a, zirlaite'n an lo ziak thla hlawm," a ti a; zirlaite'n an ziaklohbu (rough book)-a suggestion an lo ziah chhàwn chu finfiahna atan kawl ṭhat a nih thu a sawi.

Education Minister chuan, suggestion darh nia lang chu uluk taka chhui a nih hnuah nasa taka darh a ni lo tih sawiin, "A chhuahna sikul naupang pawhin an nei vek lo. Zirlai ṭhenkhat, special class kal tura tih hi an kal vek lo a, a kalte pawh hian an lo ziak thla vek lem lo tihte pawh hriat a ni," a ti.

Dr Vanlalthlana chuan, a hoin March 9 (Inrinni) leh March 10 (Pathianni)-ah emergency meeting an neih thu sawiin, "Sorkar chuan a ngai pawimawhin zia lo a ti tak zet. Vawiinah Examination Committee an ṭhukhawm dawn a, hemi (SS) paper bika hmalak chhunzawm dan tur an ngaihtuah ang. MBSE hnuaia class-10 exam hi chu routine pangngai angin a kal chhunzawm dawn," a ti.

School Education Minister sawi danin, dikhlel taka SS subject-a suggestion petu zirtirtuin sorkar hnathawk a nih anga sorkar dan a zawm loh avangin a chungah action lak a ni. CCS (Classification, Control and Appeal) Rules, 1965 hmangin March 10, 2024 khan a hna aṭanga chawlh lailawktir (suspend) a ni. March 10 vêk khan MBSE hotute'n police station-ah FIR an thehlut a; department-in disciplinary proceedings a ti chhunzawm dawn bawk.

Education minister Dr Vanlalthlana chuan, HSLC exam-a subject pakhata suggestion leh exam zawhna inang tam lutuk vanga Assembly House-a thu sawi a ngai chu School Education department leh MBSE-in pawi an ti tak zet tih sawiin, "MBSE hian board exam-te hi a ngai pawimawh a, kum tam tak tawnhriat aṭangin fimkhur takin a buatsaih ṭhin," a ti a; printing press aṭanga zawhna a puh rûk loh nan Mizoram páwnah zawhna chhut ṭhin a nih thu a sawi.

Zawhnate chu Mizorama exam centre hrang hrangah him taka a thlen theih nan district headquarters tinah MBSE officer-te kalin an sem ṭhin tih sawiin Minister chuan, "District headquarters ṭheuh aṭangin centre superintendent-te'n anmahni ngeiin an lam a, an khua ṭheuha police out-post-ah emaw, police duty awmna hmunah emaw him takin exam chhung zawng vawn ṭhin a ni. Centre superintendent-te hi ziaka inkaihhruaina dan pek an nih bakah uluk taka hrilhfiah ṭhin an ni," a ti.

Education Minister sawi danin, exam chhanna (answer sheet) zawng zawng chu code pek vek a nih hnuah chhanna endiktu (examiner) hnenah pek a ni a, examiner-in tu chhanna nge tih a hre thei lo. Examiner-in an endik zawhah chhanna ennawntu (scrutiniser) hnenah a lut a, chumi hnuah pawh ennawn leh ṭhin a ni. Result peih hnuah pawh fimkhur thuah naupang ti ṭha zual eng emaw zatte chhanna chu zirtirtu thlan bikte ennawntir leh ṭhin a ni.

Board exam atana zawhna siam leh endika lo thlitfim (moderate) kawngah MBSE a fimkhur hle a, principal/headmaster-te hnen aṭangin zirtirtu thawk rei tawh, rintlak leh hmingṭhate la khawmin, mawhphurhna la thei tur zirtirtu hming a chhawp chhuak a, chuta ṭang chuan zawhna siamtu tur leh endiktu turte a thlang ṭhin.

Mawhphurtu hrang hrangte chu kaihhruaina dan ziaka pek vek ṭhin an nih bakah, moderator-te chuan hming ziak (signature) thlapin dan zâwm tura intiamkamna an nei ṭhin. Zawhna thlifima endiktu (moderator)-te hian MBSE office-ah hna an thawk ṭhin a, pindan hran bik siamsak an ni.