Kawl theih zat aia tam thawktu leh lirthei kawlte enthla mek

General Administration depart­ment (GAD) enkawltu chief minister Lal­duhoma chuan, sorkar hna­thawk, an kawl theih zat aia tam mihring leh lirthei kawlte an enthlak mek thu nimin khan Assembly session-ah a sawi.

MNF member K Laldawngliana zawhna chhangin CM Lalduhoma chuan, "Mizoram sorkar hnuaia thawk officer zingah danin an kawl theih zat a bituk aia tam mihring leh lirthei kawlte chu February 2024 chhunga inchingfel tura tih an ni. La kawl luite chu en zuitu kan indah a, a ṭul angin an chungah action lak a ni dawn," a ti.

Chief Minister sawi danin, Mizoram sorkar hnuaiah danin a phal chin aia tam thawktu (mihring) kawl an awm hriat a ni lo. Officer, lirthei dawng thei chin ni lo zingah dawng an awm a nih chuan en zui a ni dawn a, anni pawh February 2024 thlenga hun pek zingah an tel. Enthla tura an ruatte'n sorkara an hriattir chuan a ṭul angin hemna lek a ni ang.