Dampa Tiger Protection Force-te'n thla 6 chhung hlawh an la tawh lo: March 20, 2024 ral hmaa hlawh pek an phût
Dampa Tiger Reserve chhunga nungcha leh ramngaw vengtu Tiger Protection Force (TPF)-te chuan thla ruk chhung hlawh an la tawh lo a; an hlawh la lak loh zawng zawng March 20, 2024 ral hmaa an hmuh loh chuan an hna chhunzawm tawh loh an tum.
TPF Association hruaitute hnen aṭanga thu dawn danin, September 2023 aṭang khan hlawh an la tawh lo a, sorkar hotute an dawr tawh a, mahse, tun thlengin hlawh an la hmu thei lo a ni.
TPF pawl hruaitute chuan, "Nikum September thla aṭanga vawiin thlengin thawh hlawh kan la la thei lo hi hriatthiam harsa kan ti hle. Dampa Tiger Reserve hnuaia field-a hna thawkte hi chhungkua, nupui fanau châwm deuh vek kan ni a, hlawh kan lâk lohna a rei tawh avangin dawra kan bat ṭhinnate pawhin bat an phal tawh lo a, kan khawsak a harsa hle tawh a ni," an ti.
Tun hnaia TPF Association hruaitute ṭhukhawm chuan, March 20, 2024 ral hma ngeia September 2023 - February 2024 (thla ruk) hlawh sorkarin a ngaihtuahsak thei lo a nih chuan Dampa Tiger Reserve-ah nungcha leh ramngaw venga duty turin an chhuak thei tawh dawn lo tih an tarlang a; an harsatna chu a rang lama sutkiansak turin sorkar an ngen.
Dampa Tiger Reserve hnuaiah hian nungcha leh ramngaw vengtu Tiger Protection Force mi 146 vel an awm mek a ni.