ZPM-in Lok Sabha MP candidate atan Richard Vanlalhmangaiha an thlang

Kumina Lok Sabha inthlanpui neih turah ZPM party chuan an candidate atan Richard Vanlalhmangaiha s/o Wg. Cdr Vanlalzawma, Venghlui an thlang.

ZPM party Lok Sabha MP candidate tur puanna inkhawm hi nimin khan an pisaah neih a ni a, ZPM president Lalliansawta'n an candidate tur chu Richard Vanlalhmangaiha (45) a nih thu puangin, an candidate chu vote ṭheuh turin Mizoram mipui a sáwm.

ZPM candidate tur Richard Vanlalhmangaiha chuan thu sawiin, MP candidate nih chu a rûka a hmathlir a nih ve ṭhin thu a sawi a, chutih rualin, ZPM-in an official candidate atana an vawrh chhuak ta chu chona lian tak a nih thu a sawi.

Richard Vanlal-hmangaiha chuan, MP candidate nih chu a huphurh rualin, chief minister Lalduhoma kaih­hruaina hnuaia kalphung thar, mipui sorkarah mi beiseinate hlen chhuah ngei a tum dawn thu a sawi a, "Mizoram mipui zawng zawngte in vote hlu tak min pe turin in khawngaihna ka dil a ni," a ti.

ZPM MP candidate tur Richard Vanlal­hmangaiha hi kum 1978 khan Gorakhpur, Uttar Pradesh-ah a piang a, zirna lamah B.Com. a ni. MAMCO-ah assistant manager a ni ṭhin a, kum 2015 khan early retirement-in, kutkawih eizawnna lam a luhchilh a ni.