Mizorama jail-te tihphuisui tum a ni - Home Minister

Nimina Assembly session-ah Home minister K Sapdanga chuan, Mizorama jail-te tihlen tumna a awm loh thu a sawi rualin, "Tihphuisui erawh tum a ni," a ti.

ZPM MLA Lt.Col. Clement Lalhmingthanga zawhna chhangin K Sapdanga chuan, "Champhai leh Khawzawlin an inṭâwm District Jail, Champhai tihlen tumna a awm rih lo," a ti a; thawktu indaih lohna leh sum harsatna avangin Khawzawl District Jail nei turin hmalakna a awm rih loh thu a sawi.

Home Minister chuan zawh belhna chhángin, "SASCI (Special Assistance to States for Capital Investment) hnuaiah jail tihchangtlunna atan cheng nuai 750 dah a ni a, he sum hmang hian district hrang hranga jail-te tihphuisui a ni dawn," a ti.

Private placement agency-te chungchanga zawhna chhangin K Sapdanga chuan, "DC-in license a pe thei a, amaherawhchu, license neitute'n an hmang sual ṭhin nia hriat a ni. License inpek danah 'Outside Mizoram' tih a ni a, hei hian India ram chhung bik chauh a tinzâwn laiin, ram dang a huam anga ngaih theih a ni. A chiang tâwk lo deuh a ni," a ti a, terms and condition enṭhat mek a nih thu a sawi.

Home Minister sawi danin, ramri hnaiha police station-a lirtheite thuam ṭhat a ngai tih sorkarin a hria a, sum indaih lohna avangin tun maiah chuan lirthei ṭha zawk pek theih a ni rih lo a, remchang hmasa berah pek tum a ni.