Private school pawlte'n thil fel lo awm pawi an ti

Mizoram Independent School Asso­ciation (MISA) chuan, HSLC Examination 2024-a Social Science subject zawhnaah thil fel lo a awm chu pawi an tih thu leh, HSLC/HSSLC zawhna siam danah kalphung felfai zawk neih an duh thu an tarlang.

MISA hruaitute chu nimin khan an ṭhukhawm a, HSLC 2024 zawhna chungchang an sawiho a, thuchhuah an siam. HSLC 2024 zawhnaah thil fel lo a awm chu pawi an tih thu tarlangin, "Thil dik lo titute chunga dan ang taka MBSE leh sorkar hmalakna hi kan thláwp a, tun chinah chuan thil fel lo tak thleng nawn tawh lo se kan ti. He thil thleng hian zirlaite rilruah nghawng ṭha lo tak a neih theih avangin pawi kan ti hle a ni," an ti.

MISA chuan, MBSE hnuaia HSLC/HSSLC zawhna siam dan kalphung (question setting system) chu tun aia felfai leh rintlak zawka kalpui a nih theih nan ruahmanna ṭha zawk siam turin MBSE an duh thu an tarlang bawk.