Tourism-ah tualchhung ei tur uar a pawimawh - Tourism Minister
Tourism minister Lalrinpuii chuan nimin khan Chaltlanga Tourist Lodge conference hall-ah ‘Tourism awareness programme for training of tourist service providers in Mizoram’ a hawng a; Mizoram tourism chu huapzo tourism-a siam a beisei thu leh tualchhung ei tur siam uar a pawimawh thu a sawi.
Lalrinpuii chuan, tourism chu sum deh chhuahna pawimawh a nih thu a sawi a, "Mizoram tourism hi mi zawng zawng tel theihna tur huapzo tourism-a siam theih ka beisei. Hemi tihhlawhtlinna tur hian hmun ṭha leh man man si te, ei tur thianghlim leh tuihnai te, tualchhung ei tur siam uar leh mi dawnsawn thiamte a pawimawh," a ti.
Mipui tel tamna a pawimawh thu sawiin Minister chuan, "Tourism tih hian state dang leh ram dang aṭanga rawn kal mai bakah, tualchhung mite a huam. Department hi chu facilitator chauh a ni a, stakeholder-te an pawimawh," a ti a; website leh social media hman ṭangkai a pawimawh thu a sawi bawk.
Awareness programme hawnna inkhawm hi Tourism director R Lalrodingi'n a kaihruai a, Tourism officer C Ramsangzuali kaihhruaiin kal khawmte'n ‘Responsible travel' thutiam an sawi rual a, Tourism additional secretary V Lalengmawia'n Mizoram tourism chungchang a sawifiah.
Sorkar thuchhuah tarlan danin, Mizoram sorkarin Allocation of Business a tihchhuahah, tourist service provider-te - travel agent, tour operator, accommodation unit, catering unit, restaurant, spa leh resort-te chu Tourism dept hnuaiah a dah a ni.
Tourism department-a inziak lut zat
1. Hotel - 60
2. Homestay - 97
3. Guest house/inn/ lodge/motel, etc. - 20
4. Travel agent - 35
5. Tour operator - 11
6. Catering unit - 29
7. Restaurant - 700+