Covid-19: Mizoram dinhmun Mi 895 zinga 420 chhuak tawh

August 20, Ningani khan Mizoramah Covid-19 hripui vei mi 20 chuang hmuh chhuah a ni a, Mizorama hripui kai hmuh chhuah tawh chu mi 895 an ni. Hetih lai hian, nimin khan Covid-19 vei vanga Lungleia enkawl mi 18 chu an dam tawh avangin chhuahtir an ni a, heti hian mi 420 chhuahtir an ni tawh.

Nimin khan chhuahtir zinga 15 chu Lungleia BSF sipai 15 an ni a, Covid Care Centre (CCC), SIRD, Pukpui aṭang­in an chhuak. Mi dang pathum - BSF sipai pahnih leh Assam Rifles sipai pakhat chu State Referral Hospital aṭanga chhuahtir an ni thung.

Nimin thlenga Mizorama Covid-19 kai tawh mi 895 zinga mi 420 (46.93%) chu chhuahtir an ni tawh a, la chhuak lo mi 475 (53.07%) an awm. La chhuak lo zingah hripui vei tawh lo tih finfiah tawh (negative tawh) eng emaw zat an awm bawk. Sorkar thuchhuah tarlan danin, August 20 khan ZMC Covid-19 laboratory-ah mi 496 endik aṭangin hripui vei 13 hmuh chhuah niin, Aizawl district mi 12 leh Siaha district-a mi pakhat an ni. Lunglei Civil Hospital (LCH) laboratory-ah mi pakhat, Assam aṭanga lo haw, mipa kum 28 mi hmuh chhuah a ni a; Rapid Antigen Test (RAT) hmangin Kolasib district-ah mi pasarih hmuh chhuah a ni bawk.

Aizawl district-a hripui vei hmuh chhuah thar mi 12 (mipa pali leh hmeichhia pariat) zinga pakua chu Mizoram chhunga mi dang aṭanga kái chhâwng (positive contact) an nia hriat a ni. Pakhat chu BSF mi leh sa kum 29 mi, State Referral Hospital (SRH)-a awm sa a ni a; pahnih dang chu mipa kum 33 leh hmeichhia kum 45 mi, Assam leh Manipur aṭanga haw, quarantine centre (Agape, Durtlang)-a awm lai an ni.

Mizorama mi dang aṭanga kai nia hriatte chu - Chaltlang Lily Vengah mipa pakhat leh hmeichhia pahnih, kum 13, 22 leh 31 mi te, Durtlang North-a hmeichhia kum 45 mi te, Sawleng khuaah mipa pakhat leh hmeichhia pahnih, kum 25, 40 leh 48 mite leh, Darlawnah nula kum 17 leh 20 mite an ni. ZMC-a hripui vei hmuh chhuah dang pakhat chu Siaha district-a mipa kum 53 mi, Assam aṭanga haw, khung hran lai a ni a; Lunglei CH laboratory-a TrueNAT-PCR hmanga Covid-19 vei hmuh thar chu mipa kum 28 mi, Assam aṭanga rawn haw, quarantine facility-a awm mek a ni.

Rapid Antigen Test hmangin Kolasib district (Vairengte)-ah Ningani khan Covid-19 vei mi pasarih hmuh chhuah niin, hnam dang driver/handyman mipa vek an ni a, kum 25-53 inkar, Assam leh Meghalaya aṭanga rawn lutte an ni. RAT hmanga Ningania Zemabawk North mi hmuh chhuah chungchang erawh chu nimin lamah tarlan a ni tawh.

Vairengteah hian Ningani tlai dar 5 leh nimin zing dar 5 inkara mi 212 endik zinga Mizo pasarih an tel a, hripui vei Mizo pakhat hmuh chhuah a nih laiin, hnam dang zingah hmuh chhuah an awm belh lo. Kolasib aṭanga thu dawn danin, Covid-19 vei hmuh chhuah thar hi medical duty zinga mi a ni a, a taksaah Covid-19 symptom a lang ṭan a ni. Nimin chhuna mi 285 endik zingah hripui vei hmuh a ni lo.

Vairengte checkgate-a nimin tlai dar 5 thlenga RAT hmanga swab sample endik tawh zat chu 5,572 (Mizo 348 leh hnam dang 5,224) a ni a; Covid-19 vei mi 87 hmuh chhuah tawh niin, Mizo pahnih leh hnam dang 85 an ni.