Minister-in Poshan Pakhwada a hawng

Social Welfare, Tribal Affairs & Women & Child Development (SWTAWCD) minister Lalrinpuii chuan nimin khan Aijal Club Park-ah nau pai leh nau pawmte tana chaw ṭha ei pawimawhzia inzirtirna, Poshan Pakhwada (Nutrition Fortnight) a hawng.

Poshan Pakhwada 2024 hawnna inkhawmah hian stall chi hrang hrang hawn a ni a, Department of Ayush-in yoga an entir a ni.

Lalrinpuii chuan, Nutri­tion Fortnight chu Mizorama district khaw­pui tin leh ICDS block zawng zawngah activity calendar behchhana hman a nih tur thu a sawi a, "Raipuarte tan inenkawl uluk a pawimawh a, nu a râi aṭanga naupang kum hnih a lo tlin thleng hi ‘1000 Days Window of Opportunity’ tih a ni a, hemi hun chhung hi naupangte thluak a ṭhan nasat lai ber a ni. An puitlin hnua an pianphung tur leh an hma lam huna an hlawhtlinna tur thlenga hriltu a ni," a ti.

Nau pai aṭanga naupang kum hnih an tlin thlengin enkawlna uluk leh ṭha an mamawh ber lai leh enkawlna ṭha pek an ngaih nasat lai ber a nih thu sawiin Minister chuan, "Mizorama chaw ṭha khamkhawp ei tur hmuh loh vanga natna leh taksa chak lohna hrang hrang nu leh naupanga thleng ṭhinte ûm bo zel tur leh, hnam hrisel leh pian ṭha kan nih zel theih nan theihtawp chhuah a ngai," a ti a; mi náwlpui hrilh hretu leh zirtirna petu an nih theih nan hma la turin kal khawmte a sáwm.

Poshan Pakhwada hi kum 2018-a Poshan Abhiyaan a pian aṭangin kum tin March thlaah hman ṭhin a ni a; kumina thupui chu - 'Poshan bhi padhai bhi' (Education along with nutrition) tih te, 'Tribal, traditional, regional & local dietary practices focused sensitisation around nutrition' tih leh, 'Health of pregnant women and infant & young child feeding practices' tihte a ni.