Mipui tan hman chhunzawm tur

Nimina Assembly session-ah Parliamentary Affairs minister Vanlal­hlana chuan MNF member R Rohmingliana zawhna chhangin, MLA Local Area Development Fund hmanga lirthei lei chu a leitu MLA term a tàwp hnuah a lei chhan mipui tan (public purpose) hman chhunzawm tur a nih thu a sawi.

Vanlalhlana chuan, February 16, 2024-a General Purpose Committee ṭhukhawm chuan MLA-te'n an LAD Fund hmanga ruang phurhna tur lirthei an lei chu an term a tawp hnuah book value-in MLA emaw, ex-MLA emawin an khul thei ang tih a nih thu a sawi a, "An khul duh lo a nih chuan Legislative Assembly Secretariat-in sorkar kal dan ṭhin angin a tiral ang tih a ni," a ti.

Zawh belhna chhangin Parliamentary Affairs Minister chuan, General Purpose Committee thu­tlukna thar tihchhuah hmaa department khawiah emawa lirthei dah lêt a awm a nih pawhin, General Purpose Committee thutlukna chu tihchhuah tawh a nih avangin Assembly Secretariat-in a ṭul anga a tihral tur a nih thu a sawi.