KHAWTHLIR

Thisen pe

Central Mizoram Chakma Student Union leh MCSU, Lunglei Zone chuan March 9, 2024 khan Chawngte damdawi-inah thisen pek an huaihawt a; Civil Hospital, Lunglei tan thisen unit 66 an pe a, petute mipa 64 leh hmeichhia pahnih an ni.

Candidate tur ruat

PC party chuan kumin Lok Sabha MP inthlanpui awm tura an party candidate tur an ruat fel niin an tarlang. PC party hian nimina thuchhuah an siamah Lok Sabha MP candidate atana an ruat hming an tarlang tel lo thung.

Sorkarin ṭha ti lo

Home minister K Sapdanga chuan nimin khan ZPM member VL Zaithanzama zawhna chhangin, sorkar laipuiin free movement regime (FRM) tihtawp leh ramri hung a tum chungchangah, harsatna hrang hrang a thlen theih avangin Mizoram sorkarin ṭha a tih loh thu House a hrilh.

MCMC din

Election Commission of India thupek bawhzuiin Champhai district election officer James Lalrinchhana chuan Lok Sabha inthlanpui awm tur atan District Media Certification and Monitoring Committee (MCMC) din a nih thu a tarlang. MCMC chairman chu DEO niin, member secretary chu IPRO Dr Lallawmkima a ni a; member pathum - SDO (Sadar) Dr Manesia Khaimeichho, Champhai MJA presi­dent Lalhlupuia leh Champhai DDK palai C Lalhnunpuia te an awm.

Free Medical Camp

BSF 38th battalion chuan Civic Action Programme kaltlangin nimin khan Mamit district-a Silsuri Border Outpost-ah a thlawna inentirna an buatsaih. Free medical camp-ah hian BSF-a damdawi lam thiamte'n mi 255 vel hriselna dinhmun an endik a; mamawhtute hnenah a thlawnin damdawi an pe.

Internet sawiho

Lok Sabha inthlanpui lo awm tur atan nimin khan Champhai DC James Lalrinchhana, district election officer chuan internet service provider-te a kâwm. Inthlan laiin internet a ṭhat reng theih nan service provider-te chu tower an neihna hmun leh signal-in a tuam chinte bakah, signal an pek chhuah chak dante kimchang taka thehlut tura tih an ni.