Assam Rifles-in Mizoram sorkar a chháng

Assam Rifles chuan, Mizoram sorkara Home department-in lehkha an thawn chu an chhâng lêt a; AR hming tichhe thei zawnga thuchhuah siam tawh lo tur leh ram himna kawnga AR hmalaknaah ṭha taka thawhpui turin Mizoram sorkar an ngen.

August 18, 2020 tlaia AR sipaite'n Vairengtea Mizoram sorkar dan siamte pawisa loa tih­luihnaa Mizo­ram chhunga an luh avangin Mizoram sorkara Home department chuan August 19 khan AR DIG Brig. Vinod S hnenah leh­kha an thawn a, chu chu general staff officer-1 Maj. Ajay Kumar Tomar chuan DIG aiawh­in chhânna a thawn a ni.

AR hian an lehkhaah, security force-te chu ram puma lockdown lai pawhin Ministry of Home Affairs-in an hna thawk tura an chêt vel a phalsak thu an tarlang a; Mizoram sorkara Home department hnenah an sipaite leh sipai ni tin mamawh phurtute veivah phalna an dil thu leh, AR aṭangin Maj. Arvind Kumar pawh Home department-ah amah ngei kalin phalna a dil a, ni sarih chhung an nghâk chungin phalna pek an nih loh thu an tarlang a ni.

AR lehkhaah hian Mizorama an mi leh sa Covid-19 vei mi 101 an awm tawh thu leh chu'ng zinga 48 chu dam taka an chhuah tawh thu an tarlang a; AR mi Covid-19 vei mek zinga pathum chu Zoram Medical College-ah dah luh an ni tih ziakin, "Positive mek 45-te hi AR-in Covid-19 vei enkawlna tur a siamah enkawl mek an ni a, AR sipaite enkawlna atana state sorkar sum tiheka inpuh hi a dik lo a, Mizorama Covid-19 thehdarh tam ber dawttu anga min puh pawh hi a dik lo hulhual (totally baseless) a, in chhinchhiah dan pawh hi siam ṭha nghal turin kan ngen che u a ni," an ti.

Anmahniin Covid-19 laka invênna ṭha taka an kalpui thu sawiin AR chuan, "Zokhawsanga AR hmunah chauh lo chuan hmun dangah AR zingah Covid-19 kai an la awm lo a, hei hian kan fimkhurzia a tilang," an ti a, AR-in Mizorama mi dang hnenah an la kài chhâwng lo niin an sawi bawk. Heng thilte avang hian Mizoram sorkar chu AR hming tichhe thei zawnga che lo tur te, an hming tichhe thei tura thuchhuah siam lo tur te, mipuite chu AR tihmingchhe zawnga thu thehdarh lo turin an ngen a, "Ram tana ṭha tur leh ram himna tura AR hnathawhte hi ṭha taka ṭawiawm turin kan ngen a che u," an ti.