Covid-19 vei hmuh thar zingah Mizoram chhunga kái mi 9

August 20, Ningania Zoram Medical College (ZMC) laboratory-a swab sample endiknaa hripui vei mi 13 hmuh chhuah zingah Mizoram chhunga mi dang aṭanga kái chhâwng mi pakua an awm.

Mizorama mi dang aṭanga kai nia hriatte chu - Chaltlang Lily Vengah mi pathum, Durtlang North-ah hmeichhe pakhat, Darlawnah nula pahnih leh Sawlengah kum 25-48 inkar, chhungkaw pahniha mi pathum an ni.

Chaltlang Lily Veng aṭanga thu dawn danin, an venga Covid-19 vei hmuh chhuah thar pathum zinga pahnih chu nupa, kum 31 leh 22 mi an ni a, pakhat chu hmeichhe naupang kum 13 mi a ni. Nupate leh hmeichhe naupang hi inchhungkhat hnaivai an ni. Heti hian Lily Vengah hian hripui vei mi 19 an awm tawh a, state pawn aṭanga haw sipai pakhat tih loh chu Mizorama positive contact vek an ni.

Lily Venga hmuh tharte hi a hmaaa Covid-19 vei hmuh chhuah tawhte nena khawsa ho an ni a, a hma pawhin an swab sample endik tawh niin, an result a negative a, vawi hnih ennaah erawh chuan an positive ta a ni. An vai hian inkhung hrang sa an nih avangin mipui tan dawnsawn a ziaawm a, an kài chhàwn theih tur zawn (contact tracing) kawngah pawh tih tur a tam lo tih an sawi.

Durtlang North-a hripui vei hmuh thar hmeichhia kum 45 mi pawh Lily Venga hripui vei tawhte nena inkungkaihna nei a ni. Khawtlang hruaitute hnen aṭanga thu dawn danin, Covid-19 positive ta hi Lily Venga dawr nei a ni a, a kài ṭanna nia hriat Lili Venga in pakhatah zunram thiarin vawi khat a lut a, chuta ṭanga kai chu nia an ngaih thu leh, chumi lai chuan zunram a thiarna in neitute chu Covid-19 positive tih hriat a la nih loh thu an sawi.

Durtlang North Presbyterian Kohhran biak-in leh ICFAI University inkar chu containment zone-ah an puan a nih thu dawn a ni bawk. Sàwleng khuaa Covid-19 vei hmuh chhuah tharte chu nutling pahnih leh tlangval pakhat an ni a; chhungkaw pahniha mite niin, chhungkaw pakhata mite chu nufa an ni. Anni chhungkaw pahnihte hi a hmaa hripui vei hmuh chhuah tawh nurse (Darlawn PHC-a thawk) len luhna chhungkaw zinga mi an nih avangin, nurse aṭanga kái an nih an ring.

Vanglaini palai zawhna chhángin Sawleng VTF hruaitute chuan, Co­vid-19 vei mi pathum an neih belh avang­in nimin khan an kài chhàwn theih tura ngaihte an chhui leh nghal tih an sawi a, "Vantlang aurinna hmangin inhriattir turin an ti a, mi za chuang an inhriattir a, chuta ṭang chuan mi 95-te chu swab sample endik turah kan ngai a, sorkarah kan report a ni," an ti.

Darlawn aṭanga thu dawn danin, an khuaa Covid-19 vei hmuh chhuah thar nula pahnih - kum 17 leh 20 mite chu a hmaa hripui vei hmuh chhuah tawh, Darlawn PHC-a thawk nurse-te ina an kal vanga kái an nih rin a ni a; pakhat chu thil leia lut a nih laiin, pakhat zawk chu thil zuara lut a ni thung.