MNF sorkar hi kum hnih a tlin hmain Mipuiin kan ning tawh - Zodintluanga

Mizoram Pradesh Congress Committee (MPCC) treasurer Zodintluanga Ralte, Congress Legislature Party (CLP) leader ni bawk chuan, MNF sorkar chu kum hnih an sorkar tlin hmain mipuiin an ning tawh niin a sawi.

Lunglei District Congress Committee (LDCC)-in nimina an pisaa executive meeting an neih a hmanpuinaah Zodintluanga chuan, "Tun ṭuma MNF sorkar hi kum hnih an sorkar hmain Zoram mipuiin kan ning tawh. Chief Minister hi tunah hian naupang thlengin fiamthu thawh nan an hmang. Hetianga sorkar kan nin hi a la awm ngai lo," a ti.

MPCC Treasurer chuan, "MNF sorkar hmasak khan an term an hman zawh hnu khan Pu Zoramthanga'n, 'Kum nga chhung kha chu inchibai nan hun kan hmang' tiin hnathawh hman tak tak a nih loh thu a lo sawi a ni," a ti a, tuna an sorkar term hman mek a zawh hunah 'Kum 5 chhung insawifiah nan kan hmang' an la ti dawn niin a sawi.

Insawifiah rêng rêngin sorkarin hun a hman chhoh thu sawiin Zodintluanga chuan, "Assam Rifles-te pawh sawn chhuah an nih tur thu an puang a, tunah chuan an tan insawifiahna tur titamtu mai a ni. AR mi tlemtêin Vairengte gate an rawn paltlang a, sorkarin lehkha thawnin ti tawh lo turin thu a ràwn vel a, brigadier pawh ni lo, an major-in na tawkin a rawn chháng ngam a, a zahthlak a ni," a ti.

Zodintluanga Ralte chuan, sorkar chu wheelbarrow ang chiaha nawr kal chawp ngai a nih thu sawiin, "Sorkarin order a siam a, mipui an phun nuai nuai a, a hnu lawkah order sûtna order an siam leh zel mai. Hetiang reng reng hian mu leh mal nei loa nawr kal ngaiin an awm a ni," a ti a; inthlan pawh mipuiin 'A hun lo' tia thâwm an neih nasat êm avangin an sawn lo ang tih sawi ngam a nih rih loh thu a sawi.