Chite lui tui a phawn vak chhan Hydrogen Peroxide leih buak vàng

August 20, Ningania Chite lui tui phuan vár vak chu a chhan hriat tumin nimin khan sorkar official-te leh Save Chite Lui Coordination Committee-te'n an chhui a; Chaltlang aṭanga Hydrogen Peroxide litre 75 vel leih buak vang a nih thu an tarlang.

Chite lui tui phawn hriat tum hian lui mawng lam aṭangin Save Chite Lui Coordination Committee-in an chhui chho a; a hnár lam aṭangin Mizoram Pollution Control Board (MPCB) lamin chhuiin, Aizawl North SDPO (Chite Lui Nodal Officer) hoin Ramthar kài lamah chhui a ni bawk. A chhuitute hi veng hrang hranga task force duty-te'n an lo pui a ni.

Save Chite Lui Coordi­na­tion Committee aṭanga thu dawn danin, Chite lui tui a phawn vak chhan chu Chaltlanga Nazareth Hospital chhak lawka awm in pakhat aṭanga Hydrogen Pero­xide leih buak vang nia ngaih a ni. An tarlan danin, Chaltlanga chhung­kaw pakhata nu berin tun hmaa sahbawn siamna atana an hman ṭhin Hydrogen Peroxide chu sahbawn an siam tawh loh avangin Ningani tlai dar 2 vel khan an bathroom-ah bûr hnih a leih bua a; a leih buak zat chu Hydrogen Peroxide la hman loh litre 50 leh hman ṭhen tawh búra mi litre 25 vel, a vaiin litre 75 vel a ni.

Chaltlang dawrkàwn thlang aṭanga Hydrogen Peroxide leih buak chu Taitea luiah a lut a, chu chu a thlanga Bangla luiah a lut leh a, Bangla lui aṭangin Chite lui a fin thla ta a ni. Hei vang hian tui a phawn tâk vak thu leh, nimin lamah chuan a fîm leh vek tawh thu an sawi. MPCB, Save Chite Lui Coordination Committee leh police-te chuan chemical paihtute inah kalin, thil awm dan an zâwtfiah a; Hydrogen Peroxide bûr chu MPCB-in an pisaah an la a, laboratory-ah an enfiah dawn a ni.

Save Chite Lui Coordination Committee chuan, Chite lui tibawlh­hlawh thei thil paih tawh loh ni se an duh thu an tarlang a; Chite lui chhanhim tura mipui leh thuneitute ṭanrualnaah lawmthu an sawi bawk.