Covid-19 vanga sum hmuh loh cheng vbc. 2,370 - Chief Minister

Finance changtu chief minister Lalduhoma chuan nimina Assembly session-ah MNF member Robert Romawia Royte zawhna chhángin, hun pangngaia Mizoram sorkarin central aṭanga sum a hmuh tura beisei, Covid-19 lêng vanga a hmuh loh zat chu cheng vaibelchhe 2,370.80 a nih thu a sawi.

Chief Minister sawi danin, Mizoram sum hmuh tura ngaih Covid vanga a hmuh tak lohnate chu - sorkar kum 2019-20 chhungin Share of Taxes-ah cheng vbc. 867.39, kum 2020-21 chhungin Share of Taxes-ah vbc. 957.41 leh 15th Finance Commission Special Grants vbc. 546 a ni a, a vaiin cheng vbc. 2,370.80 a ni.

Sum hmuh tur eng emaw zat hmuh loh a nih rualin, Covid-19 vangin Mizoramin sorkar laipui aṭangin ṭanpuina cheng vbc. 90.63 a dawng thung a; chu'ng bakah chuan 'For Management and Control of Covid' hnuaiah National Health Mission aṭangin sum (grant) eng emaw zat dawn a ni. Corporate social responsibility hnuaia sumfai leh bungraw dawn bakah, Finance department-in a hriatpui loh sum hmuh eng emaw zat a awm bawk.

Zawhna neitu Robert Romawia Royte chuan, Covid-19 lên vanga Mizoram sorkarin sum a hmuh tura a ngaih a hmuh tâk loh chu tuna Assembly House-a chhan dan leh RTI Act tlawhchhana zawhna Finance department-in an chhan dan a inan loh thu a sawi.

RTI Act tlawhchhana zawhna Finance department-in August 19, 2022-a a chhan dan chuan, sum hmuh tura ngaih hmuh loh chu vbc. 2,632.58 tih a ni tih sawiin Robert Romawia chuan, "Share of Taxes-ah kum 2020-21 chhungin cheng nuai 1,093.73 hmuh a ni lo tia chhan a ni. Tuna House-a chhanna nen a inang leh si lo a, a khawi emaw zawk zawk hi a dik lo a nih chuan a pawi hle. Covid vanga sum hmu ṭeuh anga sawi ṭhin pawh House-a chhanna aṭangin a lang," a ti.

Chief Minister chuan, RTI Act zawhna chhanna leh House-a chhanna inan loh chhan an hre lo tih sawiin, "Covid laia sum hmuh tur ang hmuh loh leh thil dang aṭanga hmuh hi Finance department kaltlang lo a tam avangin department-in a hriatpui vek lo. Khatih laia an hriat theih chin hmangin an chháng niin a lang," a ti a; an hriat lohte an hriat belh zel a, a dik lo tihdikte a awm zel a, tuna House-a chhanna chu a dik zawk a rinawm tih a sawi.

Covid-19 len laia ṭanpuina dawn chu CM Relief Fund-ah leh a hranpaa department danga kal pawh a ṭhahnem hle tih sawiin Lalduhoma chuan, "A thlàwna damdawi-in thar sakna tur leh hmanraw leina tur te, thawktu lak belh leh laboratory din belhna turte pawh a awm. Zaa za central sorkar tum theih tura lehkha lo kal hi minister ka zawt a, a hriat pawh a lo hre lo a, mahse, register aṭangin an zawng hmu a, a hnuah NHM-ah hai chhuah a ni," a ti.