MZP-in CAA Rules, 2024 an hâl; Thawktu lâkna sût turin AMC an phût

MZP Gen. Hqrs chuan, Aizawl Municipal Corporation (AMC)-in tun hnaia thawktu a lakna chu sût turin an phût a; March 11, 2024-a tihchhuah tak Citizenship (Amendment) Rules, 2024 copy nimin khan an hâl bawk.

MZP hruaitute chu nimin khan an pisaah an ṭhukhawm a; Citizenship (Amendment) Rules, 2024 tihchhuah tâk chungchang leh AMC hnuaia hna lak dan dik lo nia sawi chungchang an ngaihtuah a ni.

MZP chuan thuchhuah siamin, AMC hnuaia geologist pathum leh urban animal husbandry & veterinary officer pakhat, junior engineer pakhat leh assistant account officer pakhat lak danah dan kalha thil tih a awm ngeia an hriat thu an tarlang a, "Mimal induhsakna uchuak tak nena heng hna pawimawh tak hi lak ngei niin kan hria," an ti.

MZP tarlan danin, AMC hnuaia thawktu laknaah dan angin advertisement chhuah a ni lo a, state sorkar phalna an lak hriat a nih loh bakah, MPSC/MSSSB kaltlanga lak a ni lo. Thawktu lakna chu MZP chuan March 15, 2024 ral hma ngeia sût turin AMC an phût.

March 11, 2024-a sorkar laipuiin a tih­chhuah tak, Citizenship (Amendment) Rules, 2024 chu North East Students’ Organisation (NESO)-in tun hma aṭanga a dodal tawh a nih avangin, hmarchhak state tinah notification/order copy hâl tura tih a ni a; MZP chuan nimin khan Citizenship (Amendment) Rules, 2024 copy chu an pisa kawtah a hâl a ni.