Ram lei/hralhah fimkhur turin chah

Land Revenue & Settlement (LRS) department chuan ram lei leh hralh chungchanga mipui hriat tur an tichhuak a; ram lei tumte chu an ram lei tur chungchangah thubuai a awm leh awm loh hre chiang hmasa tur leh fimkhur turin an chah.

LRS department chuan, ram hralh tur chu dan ang taka hralh theih a ni ngei em tih te, dan ang taka ram pass siam a nih leh nih loh te, thubuai a awm em tihte finfiah hmasa turin ram hralhtu tur leh a leitu turte an chah a, "Ram hralhtu tur chu dan ang taka ram hralh theitu a ni ngei em tih ram leitu turin a hre chiang tur a ni a, ram leitu tur chu dan ang taka Mizoram chhunga ram nei thei a ni ngei em tih ram hralhtu turin a hre tur a ni," an ti. Ram leitu tur chuan a ram lei tur awmna hmun dik tak a hriat chian a ngaih thu an tarlang.

Ram inleina thuthlung (sale deed) chu Registration Act, 1908 hnuaiah a ram awmna bialtu Sub-Registrar Office-ah ziah luh tur a nih thu tarlangin LRS department chuan, "Sorkarin mipui hnena ram a pekin boundary pillar a phun ngei tur a ni a, danin a phût angin an ram chin pawh felfai takin an hung vek tur a ni," an ti.