Sorkarin Mizoram Education Service siam a tum - Chief Minister

Chief minister Lalduhoma chu nimin khan Assembly House CM Recess Room-ah Mizoram College Teachers' Association (MCTA) hruaitute an kâwm a; sorkarin Mizoram Education Service siam a tum thu a lo hrilh.

CM Lalduhoma chuan, MCTA hruaitute'n an harsatna an thlen chung­­changah mithiam zawkte nen an lo zir chian tur thu a sawi a, "Sorkarin Mizoram Education Service siam a tum," a ti.

MCTA hruaitute chuan, ram mamawh mila University Grants Commission dan ang thlapa zirtirtu lâk (direct recruitment) zel ṭha an tih thu Chief Minister an hrilh a; zirtirtu chi hrang tam lutuk chu ṭha loa an hriat thu leh chu chuan higher education dinhmun a tichhia nia an ngaih thu sawiin, "Ṭhalai lehkha thiam ber berte'n college zirtirtu nih an châk loh phah deuh niin kan ngai," an ti.

College zirtirtute kaisanna thil te, senior deuhte department lama awm ve ṭha an tih thu te, pension an tam avangin zirtirtu lak belh a ṭul thu leh thil pawimawh dangte MCTA hruaitute chuan an thlen bawk.