Samagra hnuaia thawk mekte tan ruahmanna siam turin sorkar ngen

Federation of Mizoram Samagra Employee (FEMSE) chuan, Samagra Shiksha hnuaia hun rei tak thawk tawhte kal kân zawnga hmalakna kal mek awm a awm nia sawiin, ṭha an tih loh thu an tarlang a; Samagra hnuaia ṭhat lai hun Mizoram zirna atan hmang zo mekte tan ruahmanna siam turin sorkar an ngen.

FEMSE chuan, Mizoram zirna tihhmasawnna tura School Education minister Dr Vanlalthlana hmalakna lawmawm an ti a, a chungah an lawm thu an sawi rualin, "Samagra Siksha hnuaia hun rei tak lo thawk tawhte kal kân zawnga hmalakna kal mek awm hi ṭha kan ti lo hle," an ti.

School Education department-a zirtirtu (P/S-ah 694, M/S-ah 371, H/S-ah 350 bakah, LDC 77 leh group-D 333) leh thawktu dangte páwn lam aṭanga hnawhkhah tuma hmalakna kal mek chu sût tur leh ngaihtuahna séng ṭha leh turin FEMSE chuan sorkar an ngen a ni.

FEMSE chuan, "Samagra hnuaia kan ṭhat lai hun zawng zawng Mizoram zirna atan hmang zo a, thawk mekte tan ruahmanna min siamsak a, kan dinhmun min chawikansak ngei turin kan sorkar chak tak hi kan beisei tlat a ni," an ti.