ACB-in zangnadawmna lâk dan an chhui

Kolasib district-a national highway kawngpui thlûr lia laih tura ram lak neitute hnena zangnadawmna pek danah thil dik lo a awm nia sawi awm chungchang MJA, Kolasib district-te'n an enfiahna kal zelah nimin khan Anti Corruption Bureau (ACB) chuan Kolasib an tlawh a, MJA-te nen inkâwmin statement an la. ACB hian vawiin hian Bilkhawthlir leh North Chhimluang an tlawh ang.

NHIDCL-in NH kawngpui a zauh turah package-3 leh package-4 huam chhunga ram neitute hnenah zangna­dawmna pek a ni tawh a, thil fel lo tam tak a awm nia sawi a nih vangin MJA, Kolasib district chuan RTI Act hmangin zawhna an zawt a ni.

Competant Authority of Land Aquisition (CALA), Kolasib-in zawhna a chhan danin, package-3 chhung, Vairengte leh North Chhimluang inkarah zangnadawmna latu mi 248 an awm a, package-4 chhung North Chhimluang aṭanga Kolasib Gosen Veng inkarah zangnadawmna latu mi 218 an awm.

Zangnadawmna latute chu Kolasib MJA chuan ngun takin an zir a, kawngpuiin a paltlang tur hmun pawh nikum June leh July thla khan a hmunah tlawhin, khawtlang hruaitute leh zangnadawmna dawngtu mi ṭhenkhatte an kâwm a ni.

An hmalakna aṭanga an thil hmuh leh an mi kawmte thusawi aṭangin thil dik lo a awm ngei nia hriain Kolasib MJA chuan ACB-ah complaint an thehlut a, an thu thlen chu ACB-in thu tlingah ngaiin an bawhzui a ni.

ACB team leh Kolasib MJA hruaitute chu Kolasib Press Club-ah an inkâwm a; chanchinbumite hian zangna­dawmna sem tawhnaa an thil hmuh leh hriat dante an hrilh a, ACB lamin an lo chhinchhiah zel a ni.

Kolasib MJA president Andrew Vanlalauva chuan, an hmalakna chu mi dang tana harsatna siam tumna a ni lo tih sawiin, "Compensation chungchangah kan rilru a dik lo nasa tawh a, kan hmalakna hian hun lo kal zel turah mipuite chu compensation chungchangah kan fimkhur theih nan ni se tih hi kan duh ber a ni," a ti.

ACB hotute chuan, zang-nadawmna lak tawhna hmunah kawngte laih a nihin, kawng chin bak mahni ram anga chhál zui mai an awm ṭhin thu an sawi a; tu mahin an laksak zui ṭhin loh avangin nei zui ta pawh an awm ṭhin tih an sawi bawk.

Kolasib MJA President chuan, an hmalakna avangin phone call an dawn nasat thu leh, zangnadawmna sem leh turah harsatna tâwk awm se mawh an phur ngam dawn em tihte thlengin zawhna a dawn thu a sawi a, "Ram nei ngeiin an ram leh thlai hlutna ang dik taka pawisa an la hi kan lawmpui. Kan rilru dik lo tak siamṭhat kan duh a, mi pawisa lak tawh sa chhuh lêt emaw, mi pawisa la tur dan emaw kan tum a ni lo," a ti.

An hmalakna avangin ram neitu dik takte'n an tuar palh ang tih kan hlau a, chutiang karah chuan dik lo taka sum lak tumna a awm leh ṭhin bawk si tih a sawi.