Zirtirtu indaih lohna sukiang turin ruahmanna siam a ni - Education Minister

School Education minister Dr Vanlalthlana chuan MNF member Lalrinsanga Ralte zawhna chhangin, SEDP hnuaia zirtirtute chawlhtir an nih huna zirtirtu indaih lohna vanga harsatna sukiang turin ruahmanna siam mek a nih thu a sawi.

Zawh belhnate chhangin Education Minister chuan, Samagra hnuaiah sikul tih­changtlunna tura zirtirtu 161 lak chu dik taka kalpui a nih thu a sawi a, "Result pawh tihchhuah hnaih a ni. Appointment order pek chhuah theih ṭêp a ni ang," a ti.

School Education Minister sawi danin, SEDP zirtirtute aiawh tur chu muster roll-a lâk tura ruahman a ni a; group-B post a ni a, contract anga tih dawn chuan sum mamawh a tam a, DPAR kutah awmin ruahmanna siam mek a ni.

Dr Vanlalthlana chuan, zirtirtu atan sikul awmna khaw mite duhsak chungchangah, central scheme emaw, state sorkarin a hranpaa scheme a siam emaw a nih loh chuan, sorkarin kalphung a neih pangngai anga lak a nih chuan a khaw mite duhsak ngawt theih a ni lo niin a sawi. Samagra-ah erawh chuan a khaw mite duhsak hrâm hrâm a nih laiin, tuna lak turah chuan hmalak dan tur sawi lâwk theih a nih loh thu a sawi bawk.