Tualchher infiamna hmanrua

Integrated Child Development Scheme (ICDS), Khawzawl Project bultumin nimin khan Khawzawl Electric Veng YMA Hall-ah Rashtriya Poshan Pakhwada pualin 'Indigenous Toys Fair' buatsaih a ni.

Indigenous Toys Fair-ahhian Khawzawla anganwadi 24 aṭangin anganwadi worker leh helper-ten naupang infiamna tur hmanrua an siam chi hrang hrang an pho chhuak a; thawmhnaw hlui, mau, thing, lehkha chhia, mawza hlui, la, bûr chhia, artui kawr, thingzai bung leh sarâng hmangtea siam a ni hlawm. Centre tina worker-te'n an thil siamte naupangte tana a ṭangkaina tur an sawifiah bawk.