DTO-ah thawktu dah tum

Transport minister Vanlalhlana chuan, district thar pathumah District Transport Office (DTO)-a thawktu dah tuma hmalak mek a ni tih nimin khan Assembly House a hrilh.

ZPM member W Chhuanawma zawhna chhangin Vanlalhlana chuan, DTO hawng tura harsatna ber chu thawktu indaih lohna a nih avangin thawktu lâk phawt a ngaih thu a sawi a, "Finance leh DPAR-in hna lak an phalsak angin, district tina mi tur - motor vehicle inspector pathum, LDC pathum, enforcement sub-inspector paruk, group-D staff paruk lak remtih a ni tawh. Staff lak fel a, building a awm tawh bawk chuan office kalpui theih a ni dawn," a ti.

Transport Minister-in zawh belhnate chhánga a sawi danin, department-in Vairengteah weighbridge an dah tawh a; Champhai, Kanhmun leh Phunchawngah dah belh an tum mek a, Green Hills Insfrastructure, Mission Vengin an buaipui.

Two wheeler leh four wheeler taxi permit pek thar chungchangah, State Transport Authority-in pek belh a ngaih leh ngaih loh te, a awm sain mipui mamawh a phuhrûk zo em tihte uluk takin a ngaihtuah ang a, STA thurâwn angin sorkar a kal dawn a ni.