Lok Sabha inthlan atan inbuatsaih

Lok Sabha MP inthlan atana inbuatsaih nan nimin khan Aizawl bawrhsap Nazuk Kumar, district election officer hoin DC Conference Hall-ah party/candidate-te campaign senso hrang hrang atana rate bituktu Rate Fixation Committee an ṭhukhawm a; DC ho hian District Media Certification and Monitoring Committee (MCMC) an ṭhukhawm bawk.

Rate Fixation Committee hian campaign senso hrang hrang awm thei - aurinna, ṭhutthleng, poster, banner, flag, ei leh in, lirthei hman man, advertisement leh thil dang atana a man bithliah zat tur sawihoin an pawm. Committee-ah hian political party hrang hrang aiawhte leh sorkar official-te an tel a ni.

Aizawl district MCMC ṭhukhawmah MP inthlana print media leh electronic media kaltlanga campaign thlithlai leh endik hna a thawh tur chungchang sawiho a ni a; print media leh electronic media kaltlanga advertisement rate tur sawihoa pawm a ni.

District MCMC-ah hian DC chu chairman a ni a, IPRO pakhat chu member secretary a ni. Additional DC-te leh MJA leh CBC aiawhte member an ni bawk.