PMAY hnuaiah in sak ṭanpuina mi 24,300-in an dawng tawh

Rural Development minister Prof. Lalnilawma chuan BJP member Dr K Beichhua zawhna chhángin, PMAY (Rural) kaltlangin Mizoramah chhungkua 24,300-in PMAY (G) ṭanpuina an dawng tawh a, ṭanpuina dawng thei tur Management Information System (MIS)-a dah (attach) zat chu chhungkaw 29,967 an nih thu a sawi.

Rural Development Minister sawi danin, Pradhan Mantri Awas Yojana (PMAY) Urban-ah chhungkua 36,536-in ṭanpuina sum an dawng tawh a, ṭanpuina dawng thei tur MIS-a thun zat chu mi 37,244 an ni.

Zawh belhna chhangin Lalnilawma chuan, "A hmaa IAY tih ṭhin, 2016-17 kuma PMAY tih a nih hnuah instalment kalphung her danglam deuh a ni a, tunah hian instalment thuma pek a ni. Beneficiary thlan danah minister leh MLA-te inrawlh theih a ni lo a, hei vang hian kan ngaihthah deuh em tih ngaihdan a awm," a ti.

RD Minister chuan, ṭanpuina dawng tawh si, la pek zawh loh an awm nual tih sawiin, "A completion a tlem phah," a ti a; Socio Economic and Caste Census 2011 behchhanin central-in automated priority list an rawn siam a, BPL chhungkua in leh lo nei lo an thliar a, beneficiary atan rin nghal a nih thu a sawi.

PMAY-Gramin bikah target chhungkaw 29,967 aṭang hian January 1, 2024-a completion rate chu 8,253 a nih thu sawiin Minister chuan, "A puma la zawh loh chu 21,714 a ni. Chutih rualin, instalment dawng tawh si eng emaw zat an awm a, sorkar thar hnuaiah March 12 thlenga final instalment pek theih tur chu 15,975 niin, January aṭanga tun thlengin 7,722 zo thei turah an ngai, hmabak 14,019 a la awm dawn," a ti.

RD Minister sawi danin, PMAY ṭanpuina first instalment leh second instalment dawng tawh pawh ni se, an la dawn kim loh chuan achievement report a chhiat phah ṭhin.

Finance department-a an ngen angin March 11, 2024 khan cheng vbc. 42 pek chhuah a ni a, chumi hmang chuan buaipui zui niin, hlawhtlinna (achievement) chu 97%-ah a kai chho. Cheng vbc. 114.47 an la pek loh chu an rawn pek thuai beisei a ni.

House leader Lalduhoma chuan, account tihdanglam emaw, account neitu hming thlak emaw a awm chuan inhriattir turin a chah a, a ṭul anga action lak a nih dawn thu House a hrilh.