State páwn aṭanga vawk lak luh khap

Kumin January thla aṭangin Arunachal Pradesh leh Assam-ah vawk tam tak hri vangin an thi tawh a, chu'ngte chu African Swine Fever vang nia rin a nih avangin Mizoram sorkar chuan state páwn aṭanga vawk leh vawksa aṭanga siam ei tur reng reng lâk luh a khap.

Mizoram State Disaster Management Authority (SDMA) hnuaia State Executive Committee chairman Lalnunmawia Chuaungo, chief secretary chuan thupek chhuahin, state páwn aṭanga vawk lak luh khapna thupek chu Disaster Management Act, 2005 Section 24(Il) tlawhchhana chhuah a nih thu a tarlang a; "Myanmar bakah, ram dang leh India ram state dang aṭangin vawk, vawksa leh vawksa aṭanga siam chhuah rêng rêng lak luh khap a ni," a ti.

Thupeka a lan danin, AH&Vety department mi leh sate'n Mizorama vawk dinhmun an enfiah ang a, vawk vulhna hmunte a remchan angin an phuh thianghlim ang a, hri kai nia rinhlelh vawkte chu an dah hrang dawn a; vawk thite him taka thehthang dan turah hma an la bawk ang.

Hri kai nia rinhlelh leh hri vanga thi nia rinhlelh vawk neitute chu AH&Vety department helpline no. 0389- 233644I, 9436142908, 9436151203 leh 8794206212-ahte hriattir tur a ni bawk. Hetianga hmalakna hi National Action Plan for Control, Containment and Eradication of African Swine Fever anga tih a ni.

Chief Secretary tarlan danin, Myanmar ramah African Swine Fever vangin vawk tam tak a thi tawh a; African Swine Fever laka danna damdawi (vaccine) a awm lo a, hri kai tawhte enkawlna damdawi ṭha a la awm lo bawk.