KHAWTHLIR

MP election training

Lunglei DC conference hall-ah nimin khan Lok Sabha inthlanpui awm tura sector officer leh sector police officer-te tan training buatsaih a ni a, district election officer Ramdinliani, bawrhsapin a telpui. Training-a telte chu an mawhphurhna hrang hrang leh an tih tur leh tih loh turte hrilhfiah an ni.

Tlân lui lo turin ngen

Zohnuai Ṭhalai Ṭangrual Pawl chuan thuchhuah siamin, Traffic SP thupek angin, Vaivakawn Zohnuai - Chawlhhmun (Ropaiabâwk) kawngah lirthei lian, medium vehicle leh a chung lamte tlân phal a nih loh thu an tarlang a; Traffic SP thupek chu zâwm a, lirthei liante tlântir lui lo turin mi tin an ngen.

AEP training

Champhai District AIDS Prevention and Control Committee ruahman angin nimin aṭang khan Champhaia IPR auditorium-ah private school zirtirtute tan Adolescent Education Programme (AEP) training thawh khatna buatsaih a ni a, vawiin leh naktukah chhunzawm a ni ang. Training-ah hian Champhai district-a private school 59 aṭangin zirtirtu 118 tel tura ruahman a ni.

Career guidance

Siaha Model Career Center chuan nimin khan Siaha College-ah National Career Service Project hnuaiah Siaha COllege zirlaite tan Career and Vocational Guidance an buatsaih a; district labour employment officer (DLEO) Reuben T Kompa-a'n a hmanpui. Reuben T Kompa chuan, zirlaite zinga hna thawh tur zawng tan District Employment Exchange-ah employment registration tih theih reng a nih thu a sawi.

Dampui Rural Haat

Mamit SDO (Sadar) Carolyn LB Khiangte chuan nimin khan Mamit district NH-44A kawngpui sira Dampui chawhmeh bazar sak thar, Dampui Rural Haat a hawng. Rural Haat hi NABARD aṭanga hmuh cheng nuai 15 leh Dampui Village Council thawh Rs 75,000 hmanga sak a ni.