Mizoramah Coronavirus kai Hmuh chhuah an la awm lo
Mizorama Coronavirus (2019-nCoV) kái an awm tawh nia tun hnaia social media hrang hranga sawi chu Coronavirus kai ngei a ni tih finfiah a la nih loh thu, Health & Family Welfare department hotute chuan an sawi. Health principal director Dr F Lallianhlira pawhin thuchhuah siamin, Mizoramah Coronavirus vei finfiah an la awm loh thu a tarlang.
Health department hnuaia Integrated Disease Surveillance Programme (IDSP) state nodal officer Dr Pachuau Lalmalsawma chuan Vanglaini palai zawhna chhangin, damlo,
Coronavirus kai vanga State Referral Hospital-a dah nia sawi chuan Coronavirus a kai tih finfiah a nih loh thu a sawi a, "Sample test result a la chhuak lo a, result a chhuah hma chuan Coronavirus a kai tih sawi theih a ni lo. Fimkhur thilah Referral Hospital-ah dah a ni a, tuna a damlohna ang hi chu Coronavirus awm hma pawhin a awm fo," a ti.
Hetih lai hian, Health & Family Welfare (HFW) principal director Dr F Lallianhlira chuan thuchhuah siamin, Mizoramah Coronavirus vei finfiah an la awm loh thu a tarlang a, "State páwn aṭanga mi pakhat lo haw chu khawsik leh thâwk lama harsatna a neih avangin State Referral Hospital-ah dah (admit) a ni. Damlo admit hi tun hnaia damlo thar ni loin, nikum November aṭanga damlo ṭan tawh a nih avangin, thil dang vang a ni thei," a ti a; damloin a chhuahsan state-ah Coronavirus vanga damlo hmuh chhuah an la awm loh thu a tarlang.
HFW department tarlan danin, nimin thleng khan khawvel pumah Coronavirus vanga damlo mi 42,767 an awm a, mi 1,013-in an thih phah tawh laiin, Coronavirus kai, dam leh tawh mi 3,950 an awm a ni.
Health department chuan, Coronavirus chungchanga harsatna emaw, sawi tur nei chuan phone no. 82599 30355 leh 76309 43153-ahte hriattir theih a nih thu an tarlang bawk.
Health department thuchhuah
• State páwn aṭanga mi pakhat lo haw chu khawsik leh thâwk lama harsatna a neih avangin State Referral Hospital-ah dah (admit) a ni. Damlo admit hi tun hnaia damlo thar ni loin, nikum November aṭanga damlo ṭan tawh a nih avangin a natna hi Coronavirus vang ni loin, thil dang vang a ni thei. A chhuahsan state-ah Coronavirus vanga damlo tun thlengin hmuh chhuah an la awm lo.
• Kerala state-a mi pathum tih loah chuan India ramah Coronavirus hrik kai hmuh chhuah belh an awm rih lo.
• China aṭanga Mizorama lo haw mi parukte in lamah quarantine (khung hran) mek a ni. Vawiin (February 11, 2020) khan pakhat a rawn thlen belh a, ani pawh hi in lama tawmim turin home quarantine-a dah nghal a ni. China aṭanga Mizorama lo kîr leh zingah insawiselna nei an la awm lo.