CYMA-in AR-te hrem an phût

Central YMA chuan chhuah siamin, 46 Assam Rifle mi 15-te phalna nei loa Mizorama an lût lui chu an dem thu an tarlang a; Mizoram sorkar dan leh thupek bawhchhetute chu hrem an phût.

Central YMA chuan, hripui laka himna turin tawrh pawh huama Mizoram mipuiin sorkar hmalakna ṭha taka an ṭawiawm laiin, AR mi 15-te'n August 18, 2020 tlai dar 3:30 velah sorkar ruahmanna an dodal tih an sawi a, "Dan an bawhchhia hi kan dem tak zet. Sorkar dan ding lai anga Mizoram chhunga lut turte'n Rapid Antigen Test ti ngei tura police leh sorkar aiawhte'n an ngenna pawisa lo a, endikna paltlang loa Mizoram an rawn lut lui hi Mizo mipui leh sorkar zah lohna lian takah kan ngai," an ti.

Ruahman lâwk nia lang theiin AR captain pakhat leh hote mi 25-in Mizorama lut tur AR-te chu an lo hmuah thu tarlangin CYMA chuan, "Vairengte police duty-te ralthuam nena rîkrâp a, dan pawisa loa gate paltlang lui tura ruahmanna an siam hi dàn zah lohna lian tak a ni a, vanduaithlak kan ti hle. Dan bawhchhetute hi an phu tâwk hremna an hmuh ngei theih nana hma la thuai turin kan phût tlat a ni," an ti. AR-te chêt dan chu Mizo mipui hmuhsitna leh thamlohnaa an ngaih thu an tarlang bawk.