Kawlphetha leinaah Mizoramin leiba Rs 1,44,25,08,760 a nei mek

Power & Electricity minister F Rodingliana chuan February 16, 2024 thlenga Mizoram sorkarin kawlphetha leinaa leibá a neih zat chu Rs 1,44,25,08,760 (cheng nuai 14,425.08) a nih thu nimin khan Assembly session-ah a sawi.

PE Minister-in Aizawl South-II bialtu MLA Lalchhuanthanga zawhna a chhàn danin, Mizoram sorkarin kawlphetha leinaah kumin February 16 thlenga leiba a neih zat chu - generating company-ah Rs 1,27,08,09,493, transmission company-ah Rs 16,67,16,173 leh North East Load Dispatch Centre (NERLDC)-ah Rs 49,83,094 a ni a; a vaiin Rs 1,44,25,08,760 a ni.

F Rodingliana chuan, electric power bill bá nei lo turin ZPM sorkarin policy a nei a, Chief Minister hmalaknain March 2024 chhungin kawlphetha leina bá rulh vek tum a nih thu a sawi.

Zawh belhnate a chhannaah F Rodingliana chuan, Power & Electricity department chu corporation-a leh tum a ni a, chumi lam chu an hawi ṭan tih a sawi a, "Power-a intodelh phawt a, chumi hnua hmalak turin inbuatsaihna kawng tinreng chu corporate lam hawi zawng zel a ni tawh," a ti.

Sorkar laipui ruahman Revamped Distribution Sector Scheme (RDSS) sum hmangin Aizawl khawpuia electric hrui hlui tawhte thlâk mek a nih thu sawiin, "Hei vang hian tunlaiin electric current a thim zin phah a ni," a ti a; km. 20 vel chu hrui tharin thlâk mek a nih thu a sawi.

Minister chuan, Lawngtlai leh Siaha lam kawlphetha awm loh fo chhan an inzawt chiang a, electric hrui a hlui tawh a, a disc pawh a chhe tawh niin a sawi a; ruahsur loha ṭha taka current kaltlang thei chu ruah a sûrin a disc khî-ah current a lo lut thei tih sawiin, "Sum awm ang angin thlâk mek a ni a, ṭhál chhunga siam zawh hman tum a ni," a ti.

F Rodingliana chuan zawhna dang a chhannaah, hmun tinah transformer a indaih lo tih sawiin, "Transformer 68% chu kum 20 hma lama lei tawh niin, hei hi a ṭhat hun chhung tura ngaih a ni. A tam zawk chuan kum 20 a pelh tawh avangin sorkar tharin transformer thar lei nan cheng vbc. 7 a dah," a ti a; transformer thlak ṭul zualte thlak tum a nih thu a sawi.

PE Minister chuan, electric bill sang awm ṭhin chu system-ah dik lo a awm vang nia a lan thu a sawi a; khawl thil a nih avangin mumal lo a awm zeuh zeuh a, department-in an ennawn tura a ngaih thu a sawi bawk.