Minister-in thlai lei tur zinga kuhva tel loh chhan a sawifiah

Agriculture minister PC Vanlalruata chuan, Mizorama kuhva tharte hralhnaah harsatna a awm hran loa an hriat avangin ZPM kaihhruai sorkarin thlai thar lei tur a thlan zingah kuhva a tel lo tih nimin khan Assembly House a hrilh.

Hachhek bialtu MLA Robert Romawia Royte chuan, kuhva chu Mizorama thlai mala sum lak luh tamna ber ni hiala a rin thu sawiin, sorkarin thlai thar lei tur a thlan zingah kuhva a telh loh chhan a zawt a; sorkar kum thara an telh hman lo a nih pawhin a kum lehah tal telh turin a ngen.

Agriculture Minister chuan, ZPM-in policy a neih sa angin, thlai thar lei a tum dan chu, thlai thar leisak tak tak lam ni loin, society leh loneitute inkarah pawp a awm palha hnawhna atan sum dah a nih thu a sawi a; sawhthing leh thlai ṭhenkhatah rate a mumal loh avang leh thlai man ngêlnghet a awm loh avangin, kut hnathawktute'n a man zat hre saa hna an thawh theih nan thlai ṭhenkhatah a man duan a nih thu House a hrilh.

PC Vanlalruata chuan, thlai thar lei tur zinga kuhva a tel loh avangin an ngai pawimawh lo a ni lo tih sawiin, "A chíngtute an buai lo a, rate a tlahniam vak lo a, a hmuna lei ṭhin hnam dang hoin an lei chilh mai ṭhin," a ti a; hlâwk zawka kuhva hralh a nih theih nan Bana Kaih Policy hnuaiah a skop-a hralh a nih theih nan leh man man zawka an hralh theih nan kawng zawnpui a nih dawn thu leh, kuhva tihro dan an dappui dawn thu a sawi bawk.