ILP nei lo hnam dang 1,187 man

Mizoram Police leh Central YMA ruahman angin March 12, Thawhlehni zan khan Mizorama khaw hrang hrangah hnam dangte enfiah an ni a, ILP an neih leh neih loh leh an ILP-te a felfai em tihte endik niin, ILP fel lo mi 1,187 man an ni.

Mizorama hnam dang awmte dan ang taka awm an nih leh nih loh endik tur hian YMA branch, group leh sub-headquarters mite thawk chhuakin, an awmna huamtu police station-te nen an thawkho a ni.

Thu dawn chinah, Aizawl khawpui chhunga police station panga huam chhungah ILP nei lo leh felfai lo hnam dang 1,013 man an ni a; Aizawl khawpui pawn lama police station pasarihah ILP felfai lo mi 174 man an ni bawk. Man zingah hian naupang kum tling lo paruk an tel.

Police station huam chhungah, ILP nei lo man tamna ber chu Bawngkawn PS niin, mi 311 man an ni a; Aizawl PS (mi 284) leh Zonuam PS (mi 245)-te'n an dawt. Aizawl pawn lama ILP felhlel man tamna ber chu Lunglei PS hnuaiah niin, mi 62 an ni a; Champhai PS hnuaia mi 46 man zinga paruk chu kum tling lo an ni.

Central YMA chuan, Mizorama hna thawk hnam dang, ILP nei lo awm chungchangah hmalak zel ṭul an tih thu leh ILP pek chhuah dan enṭhat ṭula an hriat thu a tarlang a; Mizorama hmasawnna hna thawktu (construction worker/company/contractor)-te chu an hnuaia hna thawkte tan permit ngaihtuahsak turin an chah bawk.