DAY-NULM FESTIVAL 2024

Nimin khan UDPA hnuaia City Mission Management Unit-in Lunglei, Champhai, Kolasib, Serchhip leh Khawzawl district-ahte Deendayal Antyodaya Yojana-National Urban Livelihood Mission (DAY-NULM) Festival huaihawt a ni a; DAY-NULM hnuaia ṭanpuina dawngtute'n an thil siamte an pho lang.

Lunglei bawrhsap Ramdinliani'n Convention Centre-ah DAY-NULM Festival a hawng. Bawrhsap chuan, thil siamtute chu belhchian dâwl zawk leh mi hîp thei tur leh, Mizoram pawna siamte el pha tura ṭan la turin a fuih.

Champhaiah chuan CHANEM Complex-ah DAY-NULM Festival Exibition-cum-Sale buatsaih a ni a, DC James Lalrinchhana'n a hawng. Bawrhsap chuan DAY-NULM hnuaia hmalakna leh hamṭhatnate ngaihvena chhawr ṭangkai tum turin mipui a chah.

Kolasib Venglai Bazar chunga DAY-NULM Festival chu district bawrhsap John LT Sanga'n a hawng a; thlai leh thei chi hrang hrang chìn lamah hma la thar tura kal khawmte chahin, "A huho ang chauh ni loin, mimal ang pawhin tih tak zet leh taima taka hna thawh a pawimawh," a ti.

Serchhip Bazarah pawh DAY-NULM Festival buatsaih a ni a, additional DC James Lalnithanga'n a hawng. Khuallian chuan, "Sorkar laipui aṭangin scheme chi hrang hrang a lo kal ṭhin a, scheme-te hi a hlawhtlin theih nan a chhawrtute leh official-te an pawimawh. Hlâwk taka kan hman theih nan scheme hriat chian a ṭul a, rinawm leh taimak a ngai," a ti a, a huhoa thawh ngaiah inlungrual a pawimawh thu a sawi.

Khawzawlah chuan additional DC Lalfakzuala'n Little Flower School-ah DAY-NULM Festival a hawng. Khawzawlah self help group 39 leh street vendors in ziak lut 68 an awm tawh a, hamṭhatna changtu mi 1,000 chuang an awm a ni.