Social audit chungchang sawiho

Kolasib DC John LT Sanga hoin nimin khan DC conference hall-ah Social Justice & Empowerment department hnuaia scheme hrang hrang social audit chungchang sawiho a ni a; Social Audit Unit director Laltleipuii'n telpuiin, tun ṭumah hian TNT Kalvary Home, Khuangpuilam, Kolasib-ah social audit neih a nih thu a sawi.

Ṭhutkhawmah hian TNT-a National Action Plan for Drugs Demand Reduction (NAPDDR) hnuaia Integrated Rehabilitation Centre for Addicts (IRCA) leh National Action Plan for Senior Citizen (NAPSC) hmalakna hrang hrang sawiho a ni. Heng scheme hnuaiah hian TNT chuan kum 2023-24 ah sum hmuh a la neih loh thu te, NAPSC bikah phei chuan 2021 hnu lamah sum dawn a awm tawh ngai loh thu leh IRCA hnuaiah ruihhlo ngai enkawlna tur mi 15 leng siam a nih thute tarlan a ni.

TNT hian kawng tam takah inkaihhruaina anga thil an kalpui theih thu tarlan a nih rualin, scheme aṭanga sum an dawnte chu inenkawlna tur chauh a nih avangin infrastructure lamah Mizoram sorkarin hma laksak thei se, tih rawtna an siam.

Social audit-ah hian MHIP-in an enkawl Swadhar Greh-ah kum hnih chhung sum dawn a nih tawh loh dan te, Family Counselling & Guidance-ah kum khat vel sum dawn a nih tawh loh dante sawi a ni bawk.