Mizoram Police hmusitah CM puh

MNF party chuan thuchhuah siamin, chief minister Lalduhoma chu Mizoram police-te hmusitah puhin, pawi an tih thu an tarlang.

MNF chuan, Assembly budget session-ah March 11, 2024 khan CM Lalduhoma'n police-te chu 'Kut leh ke vúng bér búr' angah a chhuah nia sawiin, "Rintlak awm lo ang maia kan pasalṭhate a chhuah hi pawi kan ti. CM thusawi hi Mizoram Police hmuhsitna leh a changtu minister ngei pawh a dah hniamnaah kan ngai," an ti.

MNF chuan, "An ṭhatna lam hmuhpui lo a, an zinga mi tlemtête dinhmun an zavaia dinhmun ang maia Mizoram rorelna sang bera a sawi chhuak duh hi a pawi kan ti tak zet. Kan police zawng zawng deuh thawte hi ram tana nun hlân ngam an ni tih leh an hotute thupek anga huaisen em em ṭhinte an ni tih hi MNF ngaihdan a ni," an ti a; Mizoram police-te a chhuanchhe zawnga sawi tawh lo turin Chief Minister an ngen a ni.

MNF party chuan, sorkarna an chelh chhungin police-ah departmental promotion exam ṭha tak leh sawisel awm loin kalpui a ni a, havildar aṭangin sub-inspector-ah mi 45 an kaisan thu leh sub-inspector-ah vek mi 25 an kaisan thu an tarlang.

Chutih laiin, kumin January 29 aṭanga February 5 inkara Mizoram Police armed branch-a SI-a kaisanna tur exam-ah, kaisang àwm lo zawkte an kaisang fur niin an tarlang a, "Sorkar thar hnuaia exam hmasak ber hi a ṭha tâwk lo hle niin a hriat," tiin, ZPM sorkar chu Home department suasamah an puh a ni.