Kawlphetha thil tihchhiatah sorkarin zangnadawmna a ngaihtuahsak thei

Power & Electricity minister F Rodingliana chuan, electric current kal dik loh vanga a hmangtu (consumer)-te bungrua a chhiatin sorkarin zangnadawmna a ngaihtuahsak thei tih a sawi.

Thorang bialtu MNF member R Rohmingliana zawhna a chhannaah F Rodingliana chuan, kawlphetha kal dik lo vanga chhiatna thlengah zangnadawmna pek theih a nih thu a sawi rualin, current kal dik loh chhan hriat hmasak a ngaih thu a sawi a, "Dan kalha mipui leh consumer-te'n wiring leh connection tidanglama an lo khawih chingpen chuan dan anga hrem theih an ni zawk," a ti.

Zawh belhnate chhangin PE minister chuan, "Electric current kal dik loh vanga consumer-te bungrua a chhiatin complaint theih a ni a, a hun chhung a awm hran lo. A ngaihtuahtu tura ruat Redressal Committee-in a chhan leh vang uluk takin a zir chiang a, hma a la ṭhin," a ti a; zangnadawmna pek theih zat chu Redressal Committee rel ang leh a thil chhe zat anga chhût a nih thu a sawi.