PE Minister-in HEP siam tumte a sawi; Tlawngah MW 24 siam thei HEP siam tum
Power & Electricity minister F Rodingliana chuan nimin khan Assembly session-ah Tlawng, Tuivai leh Mat luia kawlphetha siam chhuahna tur hydro power project kalpui tum chungchang a sawifiah a; Mizorama lui sei ber Tlawng luiah kawlphetha megawatt 24 pe chhuak thei HEP din tum a nih thu a sawi.
F Rodingliana chuan Tuivawl bialtu MLA Lalchhandama Ralte zawhna chhangin, Lungleng khaw zâwnah Tlawng HEP din turin sorkarin a hma a la tih a sawi a, "A tirah Central Water Commission (CWC) ruahman dan chuan megawatt 54 pe chhuak thei tur a ni a, a hnuah CWC vekin megawatt 120 turin hmalak a ni. Sorkarin ngaihtuahna thar hmangin megawatt 24 pe chhuak tura ruahman a ni leh ta zawk," a ti.
Tlawng HEP-in kawlphetha a siam chhuah theih tur zat tihdanglam a nih chhan zawhna PE Minister-in a chhan danin, CWC ruahmanna hmasaah Tlawng HEP chu kum 2022-a zawh tura tih a ni a, mahse, a lui enin MW 120 siam chhuak thei tur leh kum 2024-a zawh hman tura thlak a ni.
Tlawng lui chu Aizawl tui lâkna atan bakah khualzin hîp tura cheibâwl theih tur a nih avang leh ṭhál laia a kang ṭhin avangin MW 24 siam chhuah theihna tura thlak a ni a; chutianga siam tur chuan hmun dang aṭangin sum an hmu lo a nih pawhin state suma tih mai theih tura ngaih a ni. DPR la zawh a ni lo a, tuiin a chîm tur leh zangnadawmna pek ngai a awm dawn leh dawn loh hriat theih a la ni lo.
PE MINISTER SAWI DANGTE
☑ Tuivai lui khuah tum hi a tirah MW 210-a ruahman a ni a, zir chian hnuah MW 150 velah tihtlak a ni. Tui chim chin tur ram a zîm a, khuah man a hautak dawn lo. State sum lak luhna atan tih a ni a, Tuivai lui khuah tharthawh turin sorkar laipui hotute dawr mek a ni.
☑ Mat lui hi ram lailia awm a ni a, khuaptu tur kan zawng thar mek. Hydro power neihna turin investigation, DPR siam leh a ṭul anga hman atan sorkarin cheng vbc. 7 a dah.
☑ Serlui-B Hydel Project sorkarin a ngai pawimawh a, khawl siamṭhatna atan cheng nuai 15 vel kan dah. Khawl pahnih chu kumin February khan tihnun tawh a ni a, a dang pakhat chhia siamṭha turin technician kan nghak mek.