KHAWTHLIR

Thisen pe

Hrangbana College NSS chuan nimin khan an college-ah thisen pek huaihawtin, Civil Hospital, Aizawl tan thisen unit 143 an pe a, petute mipa 110 leh hmeichhia 33 an ni.

Vawk 72,451 hloh

Animal Husbandry and Veterinary minister C Lalsawivunga'n Assembly budget session-ah zawhna ziaka March 11, 2024-a a chhan danin, kum 2020-2023 chhungin Mizoramah vawk pûl hri, African Swine Fever vangin vawk 47,269 a thi a, vawk 25,182 suat a ni bawk a, a zavaiin 72,451 a ni a, Rs 1,32,20,31,000 (nuai 13,220.31) hû a tling. ASF vanga chhiatna tâwktu chu chhungkua 19,017 an ni.

Kuhva phurh khap

Kolasib district magistrate John LT Sanga chuan thupek chhuahin, Kolasib district-ah dan loa kuhva rah phurh luh khap a nih thu leh dan loa kuhva rah phurte an district-ah kaltlang phal a nih loh thu a puang. Thupek bawhchhiate chu IPC Section 188 hmanga hrem theih an ni.

MCMC ṭhukhawm

Mamit district Media Certification and Monitoring Committee (MCMC) chuan an chairman VL Remliana, bawrhsap hoin nimin khan an ṭhukhawm a; Lok Sabha inthlanpui awm tura advertisement man (rate) atan nikuma MLA inthlanpuia print & electronics media advertisement rate hman chhunzawm an rel.

Nurse hna ruak

Health & Family Welfare minister Lalrinpuii'n Assembly budget session-ah zawhna ziaka March 11, 2024-a a chhan danin, HFW department-ah staff nurse hna ruak 143 a awm a, health worker hna ruak 412 a awm. Staff nurse post ruakte chu hnawhkhat turin ruahmanna kalpui mek a ni.

Principal pangngai nei college 5 awm

Higher & Technical Education minister Dr Vanlalthlana'n Assembly budget session-ah zawhna ziaka March 11, 2024-a a chhan danin, Mizoram sorkar college zingah principal pangngai (qualified principal) nei college panga chiah an awm a; college dang zawngin principal pangngai nei loin, principal mawh­phurhna latute enkawlna hnuaiah an kal a ni.