MNF-in ramri hung tum an dodal

MNF party chuan, sorkar laipuiin India leh Myanmar ramri hnaiha hman ṭhin Free Movement Regime (FMR) a titawp chu sût leh thuai an phût thu leh, India leh Myanmar inrìna sorkar laipuiin hung a tum chu an dodal tlat thu an tarlang.

Nimin khan Vanapa Hall-ah MNF National Executive Meeting neih a ni a, party president Zoramthanga'n a kaihruai. MNF term hluia Executive member-te term chu June 1, 2024 thleng pawh sei an rél a; Mizoram politics inlumleh dante leh Lok Sabha inthlan awm turte an thlir a, resolution an siam bawk.

MNF resolution chuan, "Central sorkarin Myanmar nena kan inrìnaa zalen taka kan inkal pawh theihna hmun phal chin a neih ṭhin Free Movement Regime a rawn titawp hi a pawi kan tiin, kan dodal tlat a, a thutlukna sût leh thuai turin kan phût tlat a ni," a ti.

India leh Myanmar inrina sorkar laipuiin hung tuma hma a la mek chu an dodal tlat tih sawiin MNF chuan, "Hemi kawnga ZPM sorkar chêt dan chu a duhkhawp loin, BJP nena an puanhnuai thil lo lan chhuahnaah kan ngai," an ti a; ram buai vanga Myanmar, Bangladesh leh Manipur aṭanga Mizoram rawn bêltute harsatna an hriat reng thu sawiin, thlamuang taka Mizorama awm turin duhsakna an hlan.

MNF resolution chuan, an president Zoramthanga kaihhruaina an ring tâwk a, office bearer thlan tharte nen lungrual tak leh chak takin an kal zel dawn tih a tarlang a, "Kan ram, kan hnam leh sakhua a him zel theihna turin Pathian leh kan ram tan ti chung zelin huaisen takin kan kal zel dawn a ni," a ti.

Resolution-ah hian, MNF MLA thlan tlin tharte an chhuan thu te, budget session neih zawk tâkah an mawhphurhna an hlen ṭhat thu te, an hnathawhte fakawm an tih thute an tarlang a; Mizoram MP pahnihte huaisen leh ṭhahnemngai taka an thawk ṭhin chu an chhuan thu an tarlang bawk.