HSLC SS subject exam ṭha dawn lo

Mizoram Board of School Education (MBSE) chuan, High School Leaving Certificate (HSLC) Examination, 2024 neih meka exam zawhna leh sikul pakhata suggestion inpek inang eng emaw zat awmna, Social Science subject-ah exam ṭhat (nawn) a ni dawn lo tih a puang.

MBSE chuan nimin khan hriattir chhuahin, "MBSE-in HSLC Examination, 2024 a kalpui mekah Social Science exam ṭhat/nawn a ni dawn lo tih kan inhriattir e," a ti. Chutih rualin, Social Science answer paper endik dan turah zirlai tute mahin an tawrh lohna tur leh hamṭhatna chang bik an awm lohna turin Examination Committee-in hma a lak dawn thu a tarlang.

Zawhna chungchanga thil duhawm lo thleng vanga zirlai, zirtirtu leh zirlai nu leh pate rilru chî-âina leh hlauhthawnna thleng zawng zawngah School Education department leh MBSE-in pawi an tih tak zet thu an tarlang a; "Zirlaite harsatna hrethiam takin MBSE chuan hma a la dawn a, tu mah chî-âi lo tur leh thlamuang taka awm ṭheuh turin a chah a ni," an ti.

Thil duhawm lo a thlen nawn tawh lohna turin MBSE-in hma a lak zel dawn thu an tarlang bawk.