Mipui sorkar din kan tum tlat - CM

Nimina Mizoram State Project Monitoring Committee ṭhutkhawmah chief minister Lalduhoma chuan, mipui sorkar din an tum tlat thu a sawi.

Lalduhoma chuan, Mizorama hma­sawnna hna thawh mekte chak taka a kal a, hun tiam chhunga hna zawh ṭhin a nih theih nan leh hmasawnna hmêl thar hmuh thuai thuai a nih theih nan Project Monitoring Committee din a nih thu a sawi a, "Eirukna dona ṭha lutuk a ni. Mipui sorkar din kan tum tlat," a ti.

Political party aiawh te, tlawmngai pawl aiawh te, kohhran aiawh thlengin member an ruat tih sawiin Lalduhoma chuan, "A ṭul angin member hi la ruat belh theih a ni. Kan thuneihna pawh a zau," a ti a, dik taka hna an thawh phawt chuan Mizoramin nasa takin a hlâwkpui dawn thu a sawi.

Chief Minister chuan, Committee member zawng zawng huapa an ṭhukhawm thei chu lawmawm a tih thu sawiin, member-te chu inthlahrung hauh loa an duh zawngte sawi turin a chah.

Committee hnathawh ber tur chu Hand Holding Policy enkawl a nih thu sawiin Lalduhoma chuan, "A kaihhnawih department-te hmalakna a ṭul angin kan enpui ang a, thuràwn pekte leh hmalakna kal kawppui theih chi te, central lama funding source zawn belh thlengin kan thawk dawn," a ti a; member-te chu mithiam ber berte an ni tih sawiin, hnathawh dan awlsam leh rang, rintlak si hmanga sorkar policy pui ber kalpuia theihtawp chhuah turin a ngen a ni.