KHAWTHLIR

Chanchin ṭha thlen ni hmang dawn

Vawiin March 15 hian Mizoram Presbyterian Kohhran chuan Chanchin Ṭha Thlen Ni an hmang dawn a, tualchhung kohhran hrang hrangah hun hman tur niin, Synod aṭanga thupui thlan hmangin Pathian thuchah an ngaithla ang. March 15 hi Mizorama chanchin ṭha puangtu hmasa Rev. William Williams-a'n kum 1891-a Mizoram (Tlawng lui Kutbul lui chhuah) a thlen ni a ni a, kum 2014 aṭang khan Chanchin Ṭha Thlen Ni angin an hmang a ni.

MLA leh CYMA

Adviser to CM Lalmuanpuia Punte, MLA chuan nimin tlai khan Central YMA pisa a tlawh a, CYMA hruaitute an inkâwm. Inkawmnaah hian Mizo hnam inpumkhatna chungchang te, YMA-in hnam inpumkhatna tura hma a lak mek dante leh thil pawimawh dangte an sawiho a ni.

Lirthei khu endikna lirthei inhlân

UDPA secretary Lalmalsawma Pachuau chuan nimin khan Aizawl Smart City Limited hmalakna kaltlangin Mizoram Pollution Control Board (MPCB) hnenah lirthei khû endikna lirthei, Mobile Pollution Testing Vehicle panga a hlan. Lirthei khû endikna lirthei panga hi cheng nuai 55 man a nia, enkawl zui hna leh a hman dan tur duan chu MPCB kutah dah a ni.

Truck chesualah thi

Nimin chhun dar 12 vel khan Lunglei district-a Thingfál leh Ṭawipui South inkar, Thingfal aṭanga km. 1 vela hláah ABCI company bungraw phur truck a chesual a, a hmunah hian truck khalhtu Sipon Uddin Laskar (36), Dholai, Cachar district, Assam a thi. Thu dawn danin, truck-ah hian mi panga an chuang a, hliam mi pali chu Lawngtlai District Hospital-ah hruai an ni. Truck hi metre 100 vela thui a lum niin an sawi.

Zodintluanga ruat

All India Congress Committee (AICC) chuan National Executive Committee member atan Zodintluanga Ralte an ruat. AICC NEC member ruatna hi AICC general secretary KC Venugopal chuan a tichhuak a, India ram pumah NEC member mi 30 ruat an ni.

Detonator leh heroin man

Assam Rifles-te chuan March 12, 2024 khan an thu dawn bawhzuia Sairanga lirthei an endiknaah electronic detonator 1,000 leh gelatin gel 252 an man a, Sairang Police Station-ah an hlan.
Puak thei thil kawltu Lalrokima (35) s/o Biakthangsanga, Mission Veng leh H Lalmalsawma (35) s/o H Lalrinawma, Phunchawng te man an ni a; an lirthei hmante hrên a ni bawk.
Assam Rifles leh Mizoram Police Special Narcotics Police Station-a thawkte chuan March 12, 2024 vek khan Zemabawk North-ah mi pahnih hnen aṭangin heroin gram 236 an man a; ruihhlo kawltu Churachandpur lam mi pahnih - Ngaihnu (35) w/o Lalthlamuan leh B Suanminthang (54) s/o Khupsuanthang te an man nghal. Heroin hi international market-ah Rs 1,65,20,000 hu a ni.

Beer leh zu man

Champhai police-te chuan Nilaini zan zanlai pelh hnu dar 1 vel khan Champhai Khankawna Police check gate-ah 407 truck MZ-04 A-6063 aṭangin ram dang beer búr 2,400 leh zu (Soju) ûm 1,000 an man. Lirthei khalhtu MC Lalnunsiama (34) s/o Ralkapthanga leh H Lalngaihzuala (46) s/o H Dozika, North Khawbung ve ve nia insawite an man bawk. Beer hi Rs 11,00,000 hû a ni a, zu (Soju) chu Rs 1,80,000 hû a ni.

MCO-in ruat

Mizo Cultural Organisation Gen.Hqrs hruaitu tharte tun hnaia ṭhukhawm chuan kum 2024-25 chhunga executive member tur, patron, senior adviser leh legal adviser turte an ruat. Sub committee panga - Land & Building, Media & Publicity, Performing Troupe, Programme Implementation leh Property & Documentation sub-committee an siam nghal bawk.