World Kidney Day hman a ni

Nimin kha World Kidney Day a ni a, Mizoramah a vawi khat nan Health & Family Welfare minister Lalrinpuii hoin Synod Hospital-ah hman a ni. Minister chuan, Mizoramah Mizo doctor-te hmanga kidney (kal) thlâk a nih theih nan sorkarin theihtawp a chhuah thu a sawi.

HFW Minister chuan, kal (kidney) chhia enkawl nan sorkarin Covid-19 hma kum nga chhungin kal thlâkna atana sum a sen zat chu, NOC pek chhuah angin cheng vbc. 28 a nih thu a sawi a, "Senso tisangtu ber chu Mizorama kal thlâkna awm lo hi a ni. Mipui mimir, mi rethei zawkte tan Mizoramah ngei Mizo doctor-te hmanga kal thlâk a nih theih nan sorkarin theihtawp a chhuah," a ti.

Kal thlâkna hmun leh hmanrua neih tumin hmalak mek a nih thu sawiin Lalrinpuii chuan, "Kal natna benvawn (chronic kidney disease) lo nei palh tawhte tan pawh district hospital tinah dialysis centre dah tura hmalak chhoh zel a ni," a ti a; Aizawl, ZMC, Lunglei, Champhai, Kolasib-ahte dialysis tih theih a nih tawh thu a sawi.

Health Minister chuan, kal pawimawhna hriat leh kal natna laka invên dan sawi uar a ṭul thu sawiin, "Zoram mipuite'n hrisel taka nun kan mamawh a, kan taksa mamawh tâwk insawizawi leh ei in ṭha lak luh inzirtir a ṭul hle," a ti.

World Kidney Day hi Synod Hospital-a Nephrology depart­ment buatsaiha hman a ni a; Synod Hospital medical superintendent Dr RL Sanghluna'n kaihruaiin, dialysis patient kum 60 chuang tawhte hnenah thil pek hlan a ni.

World Kidney Day hi kum tin March thla Ningani vawi hnihnaah hman ṭhin a ni a, kumina thupui chu 'Kidney health for all' tih a ni.