Kuhva hralhnaah harsatna an tâwk

Zamuang Arecanut Grower’s Cooperative Society Ltd (ZAGCOS) chuan, kumina kuhva rah an hralhnaah tun hnaiah Assam lam aṭangin harsatna an tâwk tih sawiin, kalkawnga harsatna an tawh chu chinfelsak tur leh kuhva hralh dan hlâwk zawk ngaihtuahpui turin thuneitute an ngen.

ZAGCOS chuan thuchhuah siamin, kuhva huan siam chu Zamuang khaw mite eizawnna pui ber a nih thu an tarlang a, "Tlang ram lo neih kan bànsan tawh a, tunah hian kuhva huan siama eizawng chhungkaw 300 vel kan ni a, kumin 2024-ah hian chhungkaw 50-in kuhva huan an siam thar leh mek," an ti.

Kum 2023 chhungin Zamuang kuhva chíngtute kuhva hralh zat chu Rs 6,75,40,000 (nuai 675) man a nih thu sawiin ZAGCOS chuan, "Kan kuhva leitu vai mahajon-te'n Mitdel lui kaltlangin Assam-ah an kalpui ṭhin," an ti a; mahse, tun hnaiah Assam ram chhungah harsatna lo siam ṭhin an awm avangin kuhvate an duh angin an hralh to theih loh phah tih an sawi.

ZAGCOS chuan, "Kumin 2024 hian tuna kuhva kan hralh dan aia ṭha leh hlâwk zawk min ngaihtuahsak a, a kalkawnga harsatna awm theite min chinfelsak turin thuneitute kan ngen," an ti a; kuhva chu enkawl ngai tak a nih avangin kum tina rah ṭha tur chuan leiṭha hmanga enkawl an ngai tih sawiin, leiṭha subsidy-a an lei ve theih nan a rang lama hma laksak turin sorkar an ngen bawk.