Saa intodelh turin beihpui Thlak a ni dawn - Vety Minister

Animal Husbandary and Veterinary (AH&Vety) minister C Lalsawivunga chuan nimin khan Thenzawla AH&Vety Farm a tlawh a; saa intodelh tura beihpui thlak a nih dawn thu a sawi.

C Lalsawivunga chuan, sa leh bawng­hnuteah Mizoram a intodelh theih nan beihpui thlak a ni dawn tih sawiin, "Saa kan intodelhna tura hmanraw pawimawh berte zinga mi chu ran chaw (fodder)-a intodelh hmasak a ni. Fodder a tam thei ang ber siam chhuah tum a ni a, Thenzawl Vety Farm-ah chak taka hmalak a ni dawn," a ti.

Mizorama bawng vulhtute harsatna sutkian nan Bana Kaih Policy kaltlangin ran vulhtute hnenah ran chaw pek a ni dawn tih sawiin Minister chuan, "Kut hnathawktute'n fodder an rawn phurh chhuah ngai loin an bawng vulhna hmun thleng department motor-in phurhsak a ni dawn," a ti a; ran chaw man chawi loin a phurhna atana petrol/diesel man chauh kut hnathawktute'n an chawi dawn thu a sawi.

Vety Minister chuan, an hmalak meknate chak lehzuala a kal theih nan Vety farm humhalh a ṭul thu a sawi a, khawtlang hruaitute, VC leh mipuite chu an hmunhma humhalhpui turin a ngen.

Thenzawl Farm-ah hian ran chaw huan (fodder plantation) hectare 15 vela zau a awm a, hmarchhak state zingah sorkar hmalaknaa fodder plantation zau ber a ni. Kumin aṭangin nasa zawka hmalak tum a ni a, buh ṭin 40 hmun vela zauah fodder plantation siam belh an tum. Fodder plantation-a ran chaw siam chhuahte chu Mizoram hmun hrang hranga bawng vulhna hmunahte sem chhuah a ni ang.