PM-in PM-SURAJ a hawng

Prime minister Narendra Modi chuan March 13, Nilaini khan video conference kaltlangin India ram pumah Pradhan Mantri Samajik Utthan and Rozgar Adharit Jankalyan (PM-SURAJ) a hawng a; Social Welfare, Tribal Affairs, Women & Child Development minister Lalrinpuii leh sorkar hotu dangte'n AMC Auditorium aṭangin an chhim.

PM-SURAJ hawnna pual hian Aizawl bawrhsap Nazuk Kumar kaihhruaiin êk-in khur (septic tank) leh tui chhia (sewer) pipe tifaitute tana hamṭhatna, National Action for Mechanised Sanitation Ecosystem (NAMASTE) scheme inhrilhfiahna hun hman nghal a ni a, êk paihtute tana invenna hmanrua sem nghal a ni.

He hunah hian Social Welfare, Tribal Affairs, Women & Child Development principal secretary KT Beicho, director Dr Lalhriat-zuali Ralte leh AMC commissioner Lalhriatpuia bakah, Aizawl khawpui phiat faitu te, septic tank tifaitute leh Social Welfare hnuaia zirlaite, an zavaiin mi 215 an tel.