Budget pawm tâkah ZPM an lâwm

ZPM party chuan, kumin February 19 - March 13 inkara Assembly budget session-ah ram hmasawnna tur, mipui thleng phak budget pharh a ni chu lawmawm an tih thu leh, House member-te inpekna leh thawhrimna fakawm an tih thu an tarlang.

ZPM chuan thuchhuah siamin, Legislative Assembly pakuana budget session hmasa ber tluang taka neih a ni tih an tarlang a, "Kalphung thar mipui sorkara ram hmasawnna tur mipui thleng phâk budget pharh a ni ta hi lawmawm kan ti a, Chief Minister, Assembly Speaker, minister leh MLA-te inpekna leh thawhrimna fakawm kan ti. Inzirna tur tam tak la awm mah se, House chhunga MLA-te nungchang leh ṭawngkam te, an cheziate mawi kan tiin kan chhuang tak zet a ni," an ti.

Health care bill-a mipui harsatna sutkian a ni ta te, tar pension Rs 1,000-a tih pun a ni te, police-te harsatna tawh ṭhin rifle allowance 40% aṭanga 80%-a tihpun a ni te, minister-te'n an department chan ṭheuha hmachhawp an neite chu lawmawm an tih thu sawiin ZPM chuan, "Thawk rim apiangte hlawhtlinna tur budget pharh a ni ta hi ṭhalaite tan beiseina thar thlentuah kan ngai," an ti a; kalphung thar mipui sorkarah Mizoramin hmasawnna hmel thar a hmu ngei dawna an hriat thu an tarlang.

ZPM chuan, eptu MLA-te'n ram siamṭhatna kawnga sorkar an thlâwpna zawng zawngah an lawm thu an tarlang a, "Ṭum danga kan la hmuh ngai loh budget session danglam tak leh hriat reng tlakah kan ngai a ni," an ti.